༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡༡ ཉིན་ྋགོང་ས་ྋསྐྱབས་མགོན་ཆེན་པོ་མཆོག་ལ་ཨ་རིའི་མངའ་སྡེ་ཨར་ཀན་སིའི་གཙུག་ལག་སློབ་གྲྭའི་ཆེ་བསྟོད་ཀྱི་མཁས་དབང་གི་ཕྱག་ཁྱེར་ཌོཀ་ཊོར་ཨོབ་ཧུ་མན་ལེ་ཊར་ (Doctor of Humane letters) ཞེས་པ་དེ་འབུལ་ལམ་ཞུས་ཡོད་པ་རེད། ྋགོང་ས་མཆོག་ཨ་རིའི་མངའ་སྡེ་ཨར་ཀན་སར་ཆིབས་བསྒྱུར་གྱིས་ཐོག་མར་ཕ་ཡེ་ཏི་ཝིལ་ལེའི་ (Fayetteville) གྲོང་ཁྱེར་དུ་ཡོད་པའི་ཨར་ཀན་སིའི་གཙུག་ལག་སློབ་གྲྭའི་མུ་ལིན་སི་དཔེ་མཛོད་ཁང་ (Mullins Library of the University of Arkansas) ྋཞབས་སོར་བཀོད་དེ་བོད་ཀྱི་རིག་གཞུང་དང་འབྲེལ་བའི་བདག་ཅག་གི་སྟོན་པའི་ཞལ་ཐང་དང་། འབྲས་སྤུངས་བློ་གསལ་གླིང་གི་དགེ་འདུན་པས་བཞེངས་པའི་སྤྱན་རས་གཟིགས་ཀྱི་རྡུལ་ཚོན་དཀྱིལ་འཁོར་སོགས་ལ་སྤྱན་ཞིབ་མཛད་རྗེས། གཙུག་ལག་སློབ་གྲྭའི་སྦ་ཌ་ཝལ་ཊོན་ཨེ་རི་ནར་ (Bud Walton Arena) ཆིབས་སྒྱུར་གནང་སྐབས་གཙུག་ལག་སློབ་གྲྭའི་གཙོ་འཛིན་ཆེན་མོ་སྐུ་ཞབས་ཌེབ་ཇིར་ཧ་ཌ་ (Dave Gearhart) མཆོག་གིས་ཕེབས་བསུ་གཟབ་རྒྱས་ཞུས། དེ་རྗེས་ྋགོང་ས་མཆོག་གིས་ཚོགས་ཁང་དུ་མི་གྲངས་ཆིག་ཁྲི་བརྒལ་བ་བཞུགས་པའི་འཚེ་མེད་ཞི་བའི་ཐབས་ལམ་སྣ་ཚོགས་ཞེས་པའི་བགྲོ་གླེང་ཚོགས་འདུའི་ཚོགས་མགོན་དུ་ྋཞབས་སོར་བཀོད་དེ་བཀའ་སློབ་ཟབ་མོ་སྩལ་ཡོད་པ་རེད། སྐབས་དེར་ྋགོང་ས་མཆོག་དང་ལྷན་དུ་བགྲོ་གླེང་ཚོགས་འདུར་ཡེ་ཤུའི་བཙུན་མ་སྙན་གྲགས་ཅན་ཧེ་ལན་པི་རི་ཇན་ (Sister Helen Prejean) དང་སྐུ་ཞབས་ཝིན་སིན་ཧར་ཌིང་ (Vincent Harding) རྣམ་གཉིས་ཡོད་པ་རེད། སྐབས་དེར་ྋགོང་ས་མཆོག་ནས་ང་ཚོ་འགྲོ་བ་མི་ ནི་སྤྱི་ཚོགས་ལ་བརྟེན་པའི་སེམས་ཅན་ཞིག་ཡིན་པས་གང་ཟག་སྒེར་གྱི་བདེ་དོན་ཚོགས་པ་སྤྱི་ལ་བརྟེན་ནས་ཡོད་པ་ལས། རུས་སྦལ་གྱི་སྒོ་ང་ཇི་བཞིན་སྐྱེས་མ་ཐག་ནས་ཨ་མའི་བྱམས་སྐྱོང་ལ་བརྟེན་མི་དགོས་པ་དེ་འདྲ་མིན། ང་རྒྱལ་བྱེད་པ་དེ་ཡང་ང་ཚོའི་རང་བཞིན་ལ་ཡོད་པ་དེ་དག་མིའི་འདོད་རྔམ་ལས་བྱུང་བ་ཞིག་ཡིན། གཞི་རྩའི་ཐོག་འགྲོ་བ་མིའི་རང་བཞིན་ནི་ཞི་འཇམ་ལྡན་པ་ཞིག་ཡིན། ཚན་རིག་པ་ཚོས་ཁོང་ཁྲོ་ཡང་ཡང་བྱེད་པ་དེ་དག་གིས་ལུས་པོའི་འཕྲོད་བསྟེན་ལ་གནོད་ཀྱི་ཡོད་པ་ར་སྤྲོད་བྱས་ཡོད། བྱམས་པ་དང་བརྩེ་བས་ཀུན་ནས་བླངས་པའི་ལས་ལ་འཚེ་བ་མེད་ལ། ཞེ་སྡང་གིས་ཀུན་ནས་བླངས་པའི་ལས་ནི་འཚེ་བ་ཡིན་པ་བཀའ་གནང་ཡོད། ཡེ་ཤུའི་བཙུན་མ་ཧེ་ལན་པི་རི་ཇན་ (Sister Helen Prejean) གྱིས་སྲོག་ཐོག་གི་ཉེས་ཆད་ཕོག་པའི་བཙོན་པ་ཁག་གཅིག་དང་ཐུག་འཕྲད་ཀྱིས་ཁོང་ཚོ་དང་བསམ་ཚུལ་བརྗེ་ལེན་བྱས་པར་བརྟེན་དེ་རྗེས་ཁོང་གིས་སྲོག་ཐོག་གི་ཉེས་ཁྲིམས་མེད་པ་བཟོ་རྒྱུའི་ལས་འགུལ་བརྩམས་ལུགས་སོགས་ཞིབ་ཕྲ་གསལ་བཤད་གནང་བ་དང། དེ་བཞིན་སྐུ་ཞབས་ཝིན་སིན་ཧར་ཌིང་ལགས་ཀྱིས་རང་ཉིད་ཀྱི་ཉམས་མྱོང་ཐོག་ནས་འཚེ་མེད་ཞི་བའི་ཐབས་ལམ་འདྲ་མིན་ཡོད་པར་ངེས་པ་རྙེད་ཚུལ་དཔེ་མཚོན་དང་སྦྲགས་ནས་གསལ་བཤད་གནང་པ་རེད། བགྲོ་གླེང་གི་ཚོགས་འདུ་གྲོལ་ཏེ་ཉིན་གུང་ལྗགས་སྨིན་རྗེས་ྋགོང་ས་མཆོག་གཙུག་ལག་སློབ་གྲྭའི་སྦ་ཌ་ཝལ་ཊོན་ཨེ་རི་ནར་སླར་ཡང་ཆིབས་སྒྱུར་བསྐྱངས་ཏེ་དུས་རབས་གསར་པའི་ནང་འཚེ་མེད་ཞི་བའི་མདུན་ལམ་ཞེས་པའི་བརྗོད་གཞིའི་ཐོག་བཀའ་སློབ་སྩལ་ཞིང་། དེ་ཡང་ྋགོང་ས་མཆོག་གིས་མང་ཚོགས་མི་གྲངས་ཆིག་ཁྲི་ཉིས་སྟོང་བརྒལ་བར་བཀའ་སློབ་མ་གནང་གོང་གཙུག་ལག་སློབ་གྲྭའི་གཙོ་འཛིན་ཆེན་མོ་སྐུ་ཞབས་ཌེབ་ཇིར་ཧ་ཌ་མཆོག་གིས་མང་ཚོགས་ལ་ྋགོང་ས་མཆོག་གིས་འཚེ་མེད་ཞི་བའི་ལྟ་གྲུབ་ལ་གཞི་བཅོལ་ཏེ་འགྲོ་བ་མིའི་ནང་གི་བཟང་སྤྱོད་དང་། ཆོས་ལུགས་མཐུན་སྒྲིལ། བོད་ཀྱི་བདེན་པའི་འཐབ་རྩོད་བཅས་ཀྱི་རླབས་ཆེན་མཛད་ཁུར་གསུམ་བཞེས་བཞིན་ཡོད་སྐོར་ངོ་སྤྲོད་དང་འབྲེལ་གཙུག་ལག་སློབ་གྲྭའི་ཆེ་བསྟོད་ཀྱི་ཕྱག་ཁྱེར་ ཌོཀ་ཊོར་ཨོབ་ཧུ་མན་ལེ་ཊར་ (Doctor of Humane letters) ཞེས་པ་དེ་ྋགོང་ས་ྋསྐྱབས་མགོན་ཆེན་པོ་མཆོག་ལ་འབུལ་ལམ་ཞུས་ཡོད་པ་རེད། དེ་རྗེས་ྋགོང་ས་མཆོག་གིས་ད་ལམ་གཙུག་ལག་སློབ་གྲྭས་ཆེ་བསྟོད་ཀྱི་ཕྱག་འཁྱེར་ཕུལ་བར་ཐུགས་རྗེ་ཆེ་ཞུས་གནང་བ་དང། འགྲོ་བ་མིའི་གཞི་རྩའི་བཟང་པོའི་ཡོན་ཏན་བྱམས་པ་དང་བརྩེ་བ་སོགས་ཀྱི་སྐོར་དང། དེ་བཞིན་བོད་དང་རྒྱ་ནག  རྒྱལ་སྤྱི་བཅས་ཀྱི་གནས་ཚུལ་སྐོར་མང་ཚོགས་ཀྱིས་བཀའ་འདྲི་ཞུས་པར་བཀའ་ལན་སྩལ་ཡོད་པ་རེད།།