ཟླ༩་ཚེས་༢༨ ཉིན་གུང་བོད་མི་མང་སྤྱི་འཐུས་གྲོས་ཚོགས་མཇུག་བསྡོམས་སྟེང་སྤྱི་འཐུས་ཚོགས་གཙོ་མཆོག་གིས་ད་རེབ་༧གོང་ས་མཆོག་དང་འབྲེལ་བའི་གྲོས་ཆོད་ཅིག་བཞག་ཡོད་པ་དེ་ཧ་ཅང་ཡག་པོ་བྱུང་ཡོད་པ་དང་། གྲོས་ཚོགས་འཐུས་མི་ཚོས་ཁོག་ཏུ་གཅིག་ཉར་ནས་ཁ་ནས་གཞན་ཞིག་གསུངས་པ་མིན་པར་ངོས་འཛིན་བྱེད་ཀྱི་ཡོད་ཅེས་གསུངས་སོང་།

ཟླ་འདིའི་ཕྱི་ཚེས་༡༨ནས་༢༨བར་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པ་གངས་སྐྱིད་བཀའ་ཤག་ཚོགས་ཁང་དུ་ཚོགས་ཏེ། དེ་རིང་ཉིན་གུང་ཆུ་ཚོད་ ༡།༠༠ ཙམ་ལ་ཚོགས་འདུ་ཡོངས་སུ་མཇུག་བསྒྲིལ་ཡོད། ཐེངས་འདིར་བོད་མིའི་སྒྲིག་འཛུགས་ལས་ཁུངས་ཁག་གི་ཕྱི་ལོ་༢༠༡༢ནས་༢༠༡༣ལོའི་ལས་སྡོམ་སྙིང་བསྡུས་དང་། སྤྱི་འཐུས་རྒྱུན་ལས་ཀྱིས་ཞིབ་འཇུག་གནང་བའི་སྙན་ཐོ། དེ་བཞིན། སྤྱི་འཐུས་རྒྱུན་ལས་ཀྱི་སྐབས་ལྔ་པའི་མང་ཚོགས་རྩིས་ཁྲ་ཚོགས་ཆུང་གི་སྙན་ཐོ་སོགས་གྲོས་ཚོགས་ནང་སྙན་སྒྲོན་དང་། དེ་དག་གི་ཐོག་དྲི་བ་དྲིས་ལན་བཅས་གནང་ཡོད། གཞན། བོད་ནང་གི་ཛ་དྲག་གནས་སྟངས་ཐོག་བགྲོ་གླེང་དང་། ༧གོང་ས་མཆོག་གི་ཐུགས་དགོངས་དྭངས་པའི་གསོལ་འདེབས། གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་དང་བཀའ་ཤག་ལ་ཐུགས་སྣང་ཞེན་སྐུལ་ཁག་ཅིག་བཅས་གནང་ཡོད།   

གྲོས་ཚོགས་མཇུག་བསྡོམས་གཏམ་བཤད་སྐབས་ཚོགས་གཙོ་སྤེན་པ་ཚེ་རིང་མཆོག་གིས་ཐེངས་འདིར་བོད་ནང་རང་ལུས་མེར་བསྲེཊ་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་དང་།བོད་པར་ཤ་ཚ་ཡོད་མཁན་གྱི་གྲོགས་པོ་རྙིང་པ་གཉིས་བཅས་མྱ་ངན་གུས་འདུད་ཀྱི་རྗེས་དྲན་གྲོས་འཆར་གསུམ་དང་།བོད་ནང་གི་ཛ་དྲག་གི་གནས་སྟངས་ཐད་གདུང་སེམས་མཉམ་སྐྱེད་ཆེད་དོན་ཚན་གསུམ་ཅན་གྱི་གྲོས་ཆོད་བཅས་བཞག་ཡོད་པ་མ་ཟད།བོད་རྒྱ་ཞི་མོལ་དང་བོད་ནང་གི་ཛ་དྲག་གནས་སྟངས་སེལ་ཐབས།བོད་དོན་དཀའ་རྙོག་སེལ་ཆེད་རྒྱ་ནག་གི་མགོ་ཁྲིད་མཉམ་འབྲེལ་མོལ་བྱ་རྒྱུའི་ལས་དོན་ཐད་བཀའ་ཤག་གི་འབད་འབུངས་གནང་གི་ཡོད་པ་ལྟར།མ་འོངས་པར་དེ་ལས་ཤུགས་ཆེ་ཙམ་གནང་དགོས་པ་དང་། དེ་ཡང་རྒྱ་ནག་རང་གི་ནང་དུ་ཆབ་སྲིད་དང་སྤྱི་ཚོགས།དཔལ་འབྱོར་ཕྱོགས་གང་ཐད་ནས་འགྱུར་བ་ཤུགས་ཆེན་འགྲོ་བཞིན་ཡོད་ཅིང་། བར་ལམ་ནས་གནས་ཚུལ་མང་པོ་ཞིག་ཐོན་ཡོང་གི་ཡོད་སྟབས་དེ་དག་ལ་བསྐྱར་ཞིབ་གནང་བའི་ཐོག་ནས་གོ་སྐབས་དམ་འཛིན་དང་མ་ཤོར་བ་བྱ་རྒྱུ་ཧ་ཅང་གལ་ཆེན་ཡིན་པའི་འབོད་སྐུལ་གནང་སོང་།

ཉེ་ཆར་༸གོང་ས་མཆོག་གིས་ཐུགས་ཕམ་གྱི་བཀའ་སློབ་དང་འབྲེལ་བའི་གྲོས་ཆོད་ཐད་ཁོང་གིས། “ ད་རེབ་གྲོས་ཚོགས་ནང་གཞུང་འབྲེལ་གྲོས་ཆོད་གྲོས་འཆར་བཞག་པ་རེད།དེ་སྤྱི་འཐུས་རྣམ་པས་གསུངས་པ་ལྟར་དགའ་སྤོབས་ངང་གྲོས་ཚོགས་སུ་འཁུར་ཡོང་བ་ཞིག་ཆགས་མེད།གནས་སྟངས་ཞན་པོ་ཞིག་ལ་ང་ཚོ་བསླེབས་ཡོད་སྟབས།དེ་འདྲ་ཞིག་འཁུར་ཡོང་དགོས་ཐུག་པ་རེད།གྲོས་ཆོད་དེའི་ཐོག་བགྲོ་གླེང་དང་སྤྱི་མོས་གཏན་འབེབས་ཐུབ་པ་དེ་གྲོས་ཚོགས་ཀྱི་གཟི་བརྗིད་རེད་བསམ་གྱི་ཡོད།གྲོས་ཚོགས་ནང་ཡོད་པ་ཚང་མ་ཁོག་ཏུ་གཅིག་ཉར་།ཁ་ནས་གཞན་ཞིག་བཤད་པ་དེ་འདྲ་རྩ་བ་ཉིད་ནས་མིན་པར་ངོས་འཛིན་བྱེད་ཀྱི་ཡོད།ང་ཚོས་གྲོས་ཚོགས་ནང་དམ་བཅའ་ཡང་བཞག་ཡོད་པ་རེད།གྲོས་ཆོད་དེའི་དགོངས་དོན་ང་ཚོས་ལས་དོན་ཚགས་ཚུད་ཡོང་ཆེད་དང་།སྤྱི་ཚོགས་ནང་འཁྲུག་རྐྱེན་མི་ཡོང་བ།ལྷག་པར་དུ་༸གོང་ས་མཆོག་ལ་མཚན་སྨད་ཞུ་མཁན་ལ་ང་ཚོས་ཚམ་ཚོམ་དང་འཛེམ་ཟོན་མེད་པར་གདོང་ལེན་ཞུ་རྒྱུ་ཡིན་ཞེས་པ་ལྟར་གནང་དགོས་ཆགས་ཀྱི་རེད།དེ་མིན་པ་ཡིན་ན་ང་ཚོས་ཚིག་ཡར་བཅུག་པ་དེ་མཛེས་རྒྱན་ཆགས་པ་མ་གཏོགས།དོན་ཐོག་ལ་ཕན་ཐོགས་མེད་པ་ཞིག་རེད།  དེང་སང་སྤྱི་ཚོགས་ནང་བཀའ་མོལ་མང་པོ་ཡོང་དགོས་པ་དེ།གཅིག་ང་རང་ཚོའི་སྤྱི་ཚོགས་རང་གིས་བཟོས་བསྡད་ཡོད་པ་རེད།དེ་ལ་འགྲེལ་བཤད་མ་བརྒྱབ་པ་ཡིན་ན་མ་འགྲིག་པའི་གནས་སྟངས་ཤིག་ང་ཚོས་བཟོས་བསྡད་ཡོད་སྟབས།དེ་དག་གི་རྒྱུ་མེད་པ་ཡིན་ན་འབྲས་བུ་ཡོང་དགོས་པ་ཆགས་ཀྱི་ཡོད་པ་མ་རེད།དེའི་ཐོག་ལ་ཐུགས་སྣང་གནང་དགོས་ཀྱི་འདུག” ཅེས་གསུངས་བྱུང་།

མང་ཚོགས་ཀྱིས་ཆབ་སྲིད་དང་གཞུང་གི་ལངས་ཕྱོགས་ལ་དོ་སྣང་གནང་དགོས་པའི་སྐོར་གསུངས་དོན། “ ང་ཚོའི་སྤྱི་ཚོགས་དེ་གོ་བརྡ་འཕྲོད་ཐུབ་མཁན་གྱི་སྤྱི་ཚོགས་ཤིག་ཆགས་དགོས་ཀྱི་འདུག༸གོང་ས་མཆོག་དབུ་མའི་ལམ་ལ་ཕེབས་དགོས་པའི་རྒྱུ་མཚན་ལན་མང་བཀའ་སློབ་གནང་གྲུབ་པ་རེད།དེའི་ནང་ནས་ཡོངས་གྲགས་མཁྱེན་བསྡད་པ་དེ་ཨི་ཊ་ལི་དང་ལ་དྭགས།ས་ལུ་སྒར།སུད་སི་བཅས་རེད།ཡོངས་གྲགས་མ་ཆགས་པ་ཨོ་སི་ཊོ་ལི་ཡ་སོགས་ཆིབས་བསྒྱུར་གནང་ས་ཁག་ཏུ་ལན་མང་གནང་དགོས་ཐུག་པ་དེ་ཡང་ང་ཚོའི་སྤྱི་ཚོགས་ཀྱིས་བཟོས་པ་རེད།ང་ཚོའི་སྤྱི་ཚོགས་འདི་གནས་སྟངས་གཞན་དང་མི་འདྲ་བའི་འོག་ལྷག་བསྡད་ཡོད་པ་རེད།རང་བཙན་ཡོད་པའིོ་རྒྱལ་ཁབ་ཀྱི་མི་ཞིག་གིས་སོ་སོའི་ཆབ་སྲིད་གནས་སྟངས་ལ་དོི་སྣང་ཆེན་པོ་གནང་གི་ཡོད་པ་རེད།ང་ཚོ་ལུང་པ་མེད་པའི་མི་རིགས་དང་འཐབ་རྩོད་བྱེད་མཁན་གྱི་མིོ་རིགས་ཤིག་གིས་དེ་བས་ཀྱང་ཆབ་སྲིད་ཐོག་དོ་སྣང་གནང་དགོས་ཀྱང་།དེ་ལྟར་མ་གནང་བར་རྐྱེན་བྱས་ཏེ་དཀྲོགས་གཏམ་མང་པོ་ཞིག་ཆགས་ཡོང་གི་ཡོད། ཁག་ཅིག་གིས་ཤེས་བཞིན་དུ་སྤྱི་ཚོགས་ནང་དེ་འདྲའི་གླེང་སློང་བཟོ་བཞིན་ཡོད་པ་རེད།དེར་བརྟེན།ཚང་མས་ཐུགས་སྣང་གནང་སྟེ།ང་ཚོའི་སྤྱི་ཚོགས་དེ་གོ་བརྡ་འཕྲོད་མཁན་དང་རྒྱུ་མཚན་ལ་ལྟ་ཐུབ་མཁན་གྱི་སྤྱི་ཚོགས་ཤིག་ཏུ་བསྒྱུར་རྒྱུ་ཧ་ཅང་གལ་ཆེན་པོ་རེད” ཅེས་གསུངས་སོང་།  

ཁོང་གིས་མུ་མཐུད་དུ་གསུངས་དོན། “ ༸གོང་ས་མཆོག་གིས་འདས་པའི་ལོ་༦༠ལྷག་གི་རིང་གཡས་སྐྱོར་གཡོན་སྐྱོར་བྱས་ཏེ།ང་ཚོ་འདིར་ཚོགས་ཏེ་སྐད་ཆ་བཤད་པའི་གོ་སྐབས་ཡོད་པ་ཞིག་བྱུང་བ་རེད་ལ། བོད་པའི་ཆོས་དང་རིག་གཞུང་།སྐད་ཡིག་སོགས་ཀྱི་བསྟི་གནས་རྒྱ་ཆེན་པོ་དེ་འདྲ་ཞིག་ཆགས་ཐུབ་པ་ཚང་མ་༸གོང་ས་མཆོག་གི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ལས།གཞན་ཞིག་གིས་ཞེ་དྲག་འཇོན་ཡོད་ཅེ་ན་འཁྲུལ་སྣང་ནང་ལྷག་གི་ཡོད་པ་རེད་བསམ་གྱི་ཡོད་ལ། དུས་རྒྱུན་དེ་ལྟར་ཞུ་མཁན་ཞིག་ཀྱང་ཡིན། འདས་པའི་ལོ་༦༠རིང་༸གོང་ས་མཆོག་གི་སྐུ་ངལ་འཛེམ་མེད་ཐོག་རུབ་རུབ་བཟོས་བཞག་པ་དེ་ང་ཚོས་གཏོང་རྒྱུའི་མགོ་བཙུགས་པ་ཡིན་ན།དེ་ལས་ལྷག་པའི་གྱོང་གུད་ང་ཚོར་རག་རྒྱུ་མི་འདུགང་ཚོ་ལོ་རྒྱུས་ཀྱི་ཐོག་ནས་ཀྱང་ནག་ཉེས་ཆགས་ཀྱི་རེད།” ཅེས་སོགས་གསུངས་བྱུང་།

གསར་འགོད་པ།དོན་གོ

༄༅། །ཕྱི་ལོ་ ༢༠༡༣ ཟླ་ ༣ ཚེས་ ༡༠ ཉིན་ཡུ་རོབ་བོད་རིགས་མཐུན་ཚོགས་དང་བོད་ཀྱི་དོན་ཁང་སོགས་ཀྱིས་གོ་སྒྲིག་འོག་ཡུ་རོབ་མཐུན་ཚོགས་ཀྱི་བསྟི་གནས་སྦེལ་ཇེམ་གྱི་རྒྱལ་ས་སྦར་སིལ་ནང་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༤ པ་ཡུ་རོབ་ཡུལ་གྲུ་ཁག་བཅུ་བདུན་ནས་ཕེབས་པའི་བོད་མི་དང་བོད་དོན་རྒྱབ་སྐྱོར་གྲངས་ ༤༠༠༠ བརྒལ་བ་ལྷན་འཛོམས་ཐོག་སྲུང་བརྩི་ཞུས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ པའི་ཐོག་མེ་འཁོར་འབབ་ཚུགས་ནས་སྒྱུ་རྩལ་ཐང་ཆེན་བར་རྔམ་སྟོན་ཁྲོམ་སྐོར་གནང་གྲུབ་མཚམས་ཐང་ཆེན་དུ་ལྷན་འཛོམས་ཀྱིས་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་བཏང་སྟེ་མཛད་སྒོ་དངོས་གཞི་དབུ་འཛུགས་གནང་ཡོད། མཛད་སྒོའི་ཐོག་གནད་ཡོད་མི་སྣ་མང་དག་ཅིག་འདུ་འཛོམས་བྱུང་བའི་ཁྲོད་དུ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དུས་དྲན་དང་འབྲེལ་བའི་གསུང་བཤད་གནང་དོན། དེ་རིང་ང་ཚོས་འདི་གར་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༤ པ་སྲུང་བརྩི་ཞུ་བཞིན་ཡོད། དེ་བཞིན་བོད་ནང་ཛ་དྲག་གི་གནས་སྟངས་ཆགས་པའི་སྐབས་སུ་བོད་ནང་གི་བོད་མི་ ༡༠༧ ནས་བོད་བསྟན་པ་ཆབ་སྲིད་ཆེད་རང་ལུས་མེར་སྲེག་བཏང་ཡོད་ཁོངས་ནས་མང་ཆེ་བ་འདས་གྲོངས་སུ་གྱུར་ཡོད། བཙན་བྱོལ་ནང་ནས་ཀྱང་བོད་མི་ཁག་གཅིག་གིས་བོད་ནང་གི་བོད་མིར་གདུང་སེམས་མཉམ་སྐྱེ་མཚོན་སླད་རང་ལུས་མེར་སྲེག་བཏང་ཡོད།

དེ་རིང་འདི་གར་དམིགས་སུ་བཀར་ནས་ཡུ་རོབ་ཁུལ་གྱི་བོད་མི་ཚང་མས་མ་གྲོས་བསམ་པ་གཅིག་མཐུན་ཐོག་ཡུ་རོབ་ནང་ལོ་རྒྱུས་ལྡན་པའི་ལས་འགུལ་ཞིག་སྤེལ་བཞིན་ཡོད། དེར་བརྟེན་ངས་གོ་སྒྲིག་ཞུ་མཁན་དང་ལས་འགུལ་ནང་མཉམ་ཞུགས་གནང་མཁན་བོད་མི། དེ་བཞིན་བོད་དོན་རྒྱབ་སྐྱོར་བ་ཚང་མར་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུ་རྒྱུ་ཡིན། བོད་ནང་གི་ཛ་དྲག་གནས་སྟངས་ཞི་འཇམ་དང་བོད་མིའི་དཀའ་རྙོག་མ་གསལ་བར་དུ་ང་ཚོས་མུ་མཐུད་ལས་འགུལ་དེ་རིགས་སྤེལ་དགོས་པ་ཞིག་ཆགས་ཀྱི་རེད།

དེ་རིང་རྣམ་པ་ཚོས་མ་བསྐུལ་དང་བླངས་ཐོག་འདི་གའི་ལས་འགུལ་ནང་མཉམ་བཞུགས་གནང་བ་ལྟར། མ་འོངས་པར་ཡང་བོད་དོན་ལ་ཕན་ཐོགས་ཡོད་པའི་ལས་འགུལ་གང་འདྲ་སྤེལ་རུང་མཉམ་ཞུགས་གནང་རོགས་ཞུ་རྒྱུ་ཡིན། ང་ཚོ་རྡ་སར་གནས་སྡོད་སྲིད་སྐྱོང་གིས་དབུས་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ངོས་ནས་ཡིན་རུང། གང་ལྟར་ལས་འགུལ་གང་འདྲ་ཞིག་སྤེལ་ཡང་མི་མང་གི་ངོས་ནས་རྒྱབ་སྐྱོར་གྱི་རྣམ་འགྱུར་ཤུགས་ཆེན་པོ་བསྟན་སྐབས། ང་ཚོར་ལས་འགུལ་སྤེལ་རྒྱུའི་བློ་སྟོབས་གསར་པ་བསྐྱེད་རྒྱུར་ཕན་ཐོགས་ཆེན་པོ་ཡོང་གི་འདུག ཅེས་སོགས་ཀྱི་གསུང་བཤད་གནང་ཡོད། དེ་བཞིན་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཐོ་མན་སི་མཆོག་དང་ཕྱི་དྲིལ་བཀའ་བློན་མཆོག བཀའ་ཟུར་ཀིརྟི་རིན་པོ་ཆེ་མཆོག་སོགས་གནད་ཡོད་མི་སྣ་ཁག་གཅིག་གིས་རིམ་བཞིན་གསུང་བཤད་གནང་ཡོད

༄༅། །བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༤ པའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད།

༄༅། །དེ་རིང་ནི་མི་ལོ་ ༥༤ གོང་བོད་ཀྱི་རྒྱལ་ས་ལྷ་སར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་བཙན་འཕྲོག་བྱ་རྒྱུའི་གཡོ་བྱུས་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭར་བདོ་བའི་ངན་བྱུས་སོགས་ལ་བོད་མི་རྣམས་ཀྱིས་མ་གྲོས་བསམ་པ་གཅིག་མཐུན་ཐོག་རང་དབང་སྒེར་ལངས་བྱས་པའི་ཉིན་མོ་ཡིན་པ་དང་། དེ་རིང་ནས་བཟུང་ལོ་ལྟར་གསུམ་བཅུའི་དུས་དྲན་ཉིན་བོད་མིའི་རང་དབང་སྒེར་ལངས་ཀྱི་ཉིན་མོར་སྲུང་བརྩི་ཞུ་རྒྱུའི་ཐོག བོད་ཕྱི་ནང་དུ་བོད་དོན་ཆེད་རང་སྲོག་བློས་གཏོང་གནང་མཁན་རྣམས་ལ་རྗེས་དྲན་མཚོན་བྱེད་དུ་རྒྱལ་གཅེས་དཔའ་བོ་དཔའ་མོའི་ཉིན་མོར་ཡང་ཆབས་ཅིག་སྲུང་བརྩི་ཞུ་རྒྱུ་ཡིན།

རྒྱ་གཞུང་གིས་བོད་ནང་བཙན་འཛུལ་བྱེད་འགོ་བཙུགས་ནས་ད་བར་མི་ལོ་ ༦༤ ཙམ་འགྲོ་བཞིན་པའི་རིང་བོད་མི་ས་ཡ་བརྒལ་བ་དུས་མིན་རྐྱེན་ལམ་དུ་བཏང་བ་དང་། དགོན་པ་སྟོང་ཕྲག་མང་པོ་རྩ་གཏོར་གྱིས་མཚོན་བོད་ཀྱི་སྣོད་བཅུད་རྣམས་གཏོར་བཅོམ་འཕྲོག་གསུམ་ཡ་ང་བ་བྱས་པ་མ་ཟད། བོད་མི་རིགས་ཀྱི་ངོ་བོ་མཚོན་བྱེད་བོད་མིའི་ཆོས་དང་། རིག་གཞུང། སྐད་ཡིག་སོགས་རྩ་མེད་གཏོང་རྒྱུའི་བྱུས་ངན་རྒྱུན་ཆད་མེད་པར་བཤམས་ཏེ། བོད་ཡུལ་རྒྱ་ཡུལ་དུ་སྒྱུར་བཞིན་པའི་གནས་སྟངས་ཧ་ཅང་ཛ་དྲག་ཆགས་ཡོད་ལ། རྒྱ་ནག་གི་འགོ་འཁྲིད་ཚོས་བོད་རྒྱའི་དཀའ་རྙོག་སེལ་ཐབས་ལ་བསམ་ཞིབ་བྱ་རྒྱུ་ལས་ལྡོག་སྟེ། མགོ་སྐོར་བསླུ་བྲིད་ཀྱི་རྫུན་གཏམ་ཁོ་ནས་རྒྱ་མི་རིགས་དང་རྒྱལ་སྤྱིའི་སྤྱི་ཚོགས་སུ་དངོས་ཡོད་གནས་སྟངས་འགེབས་སྦས་བྱེད་བཞིན་ཡོད་པ་ནི་ཀུན་གྱིས་མཁྱེན་གསལ་ལྟར་ཡིན།

བོད་རྒྱལ་ཁབ་འདི་སྲིད་པ་ཆགས་པ་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བཙན་བཟུང་མ་བྱས་པའི་བར། ཆབ་སྲིད་དང་། འཛིན་སྐྱོང། ཁྲིམས་ལུགས་བཅས་པ་བོད་མི་རང་གིས་དོ་དམ་སྟངས་འཛིན་བྱས་པ་ལས། གཞན་གྱི་དབང་འོག་ཏུ་ཡེ་ནས་མེད་པའི་རང་དབང་རང་བཙན་ལྡན་པའི་རྒྱལ་ཁབ་ཅིག་ཡིན་ཞིང། དེང་རབས་ཡོངས་གྲགས་ཀྱི་རྒྱལ་ཁབ་དང་མི་རིགས་ཀྱི་འགྲེལ་བརྗོད་དང་མཐུན་ལ། དེང་སང་རང་བཙན་ཡོད་པའི་རྒྱལ་ཁབ་མང་པོ་ལས་ལྷག་པའི་ལོ་རྒྱུས་ཡུན་རིང་ལྡན་པ་ཞིག་ཡིན། ཡིན་ནའང་འཛམ་གླིང་དམག་ཆེན་གཉིས་པའི་རྗེས་རྒྱ་བསྐྱེད་རིང་ལུགས་པའི་བཙན་དབང་འོག་གི་རྒྱལ་ཁབ་མང་པོ་ཞིག་ལ་རང་བཙན་ཐོབ་པའི་དུས་དེར། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་སྐབས་དེའི་ཆབ་སྲིད་དང་གནས་སྟངས་མང་དག་ཅིག་གི་གོ་སྐབས་བླངས་ཏེ་བོད་ཐོག་དྲག་པོའི་བཙན་འཛུལ་བྱས་མཐར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་མི་བརྒྱད་ཁྲི་ལྷག་ཙམ་ ༡༩༥༩ ལོར་བཙན་བྱོལ་དུ་གྱར་དགོས་བྱུང་ཡོད།

རྒྱ་གཞུང་གིས་མི་སེར་སྤེལ་བའི་སྲིད་བྱུས་འོག་ད་ལྟའི་ཆར་དཔལ་འབྱོར་གྱི་ཁེ་ཕན་ཡོད་སའི་བོད་ཀྱི་གྲོང་ཁྱེར་ཆེ་ཁག་དང་གྲོང་བརྡལ་ཁག་ཏུ་བོད་མི་རྣམས་སྤྱི་ཚོགས་ཀྱི་མཐར་ཕུད་དེ་གྲངས་ཉུང་མི་རིགས་སུ་འགྱུར་བཞིན་པ་ནི་ཆེས་ཛ་དྲག་པའི་གནས་སྟངས་ཤིག་ཆགས་ཡོད། བོད་མི་ཚོར་ཆབ་སྲིད་ཀྱི་རང་དབང་ཡེ་ནས་མེད་ཁར། འགྲོ་བ་མི་ཡི་ཐོབ་ཐང་དང་། ཆོས་སྤྱོད་ཀྱི་རང་དབང་། འགྲུལ་བསྐྱོད་ཀྱི་རང་དབང། སྐད་ཡིག་གི་རང་དབང་བཅས་པར་དམ་དྲག་ཤུགས་ཆེ་བྱེད་བཞིན་པ་དང་། བོད་ཀྱི་ཁོར་ཡུག་ལ་སླར་གསོ་བྱེད་དཀའ་བའི་གནོད་སྐྱོན་ཚབས་ཆེ་ཕོག་ཏུ་བཅུག་ཡོད། རྒྱུ་མཚན་དེ་དག་ལ་བརྟེན་ནས་བོད་ནང་གི་བོད་མི་ཚོས་སྔ་རྗེས་སུ་རང་སྲོག་ལ་མི་འཛེམས་པར་སྙིང་སྟོབས་ཆེན་པོས་འཚེ་མེད་ཞི་བའི་སྒོ་ནས་བོད་མི་རིགས་ཀྱི་མངོན་འདོད་དང་མི་མཐུན་པའི་རྒྱ་གཞུང་གི་གདུག་རྩུབ་ཅན་གྱི་སྲིད་བྱུས་ཁག་ལ་མི་འདོད་པའི་ལས་འགུལ་སྣེ་མང་སྤེལ་ཡོད་པ་དང་། ལྷག་པར་དུ་ཕྱི་ལོ་ ༢༠༠༨ ས་བྱི་ཞི་རྒོལ་ཆེན་མོ་ནས་བཟུང་བོད་ནང་གི་གནས་སྟངས་ཆེས་ཛ་དྲག་པ་དང་ཇེ་སྡུག་ཏུ་འགྲོ་བཞིན་ཡོད།

བཙན་བྱོལ་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་འཛམ་གླིང་ཕྱོགས་གང་སར་བོད་པར་ཤ་ཚ་དང་རྒྱབ་སྐྱོར་བྱེད་མཁན་ཇེ་མང་དུ་འགྲོ་བཞིན་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་ད་ལྟའི་དངོས་ཡོད་གནས་སྟངས་ལ་གཟིགས་དཔྱད་ཀྱིས་བོད་མིའི་ཕུགས་རྒྱང་གི་བདེ་རྩ་ཁོ་ནར་དགོངས་ཏེ་རང་རྒྱལ་གཞན་ཕམ་མ་ཡིན་པའི་བོད་རྒྱ་གཉིས་སྨན་དབུ་མའི་ལམ་གྱི་ཐབས་ལམ་འདོན་གནང་མཛད་པར་མང་གཙོའི་འགྲོ་ལུགས་དང་མཐུན་པའི་ཐོག་ནས་སྤྱི་མོས་ཀྱིས་གཏན་ལ་ཕབ་པའི་སྲིད་བྱུས་འདིར་ད་བར་རྒྱ་ནག་གི་འགོ་འཁྲིད་ཚོས་ཚུལ་མཐུན་གྱི་བདག་སྤྲོད་མི་བྱེད་པ་ནི་ཡ་མཚན་གྱི་གནས་ཡིན།

དེ་རིང་གི་དུས་དྲན་འདི་བརྒྱུད་ནས་གཞིས་བཞུགས་སྤུན་ཟླ་རྣམས་ཀྱི་རྒྱལ་གཅེས་སྙིང་སྟོབས་དང་མི་རིགས་ཀྱི་ལ་རྒྱར་སྙིང་ཐག་པ་ནས་གུས་བཀུར་དང་བཀའ་དྲིན་རྗེས་དྲན་ཞུ་བཞིན་ཡོད།

ད་ལྟའི་བོད་ནང་གི་ཛ་དྲག་གནས་སྟངས་ཇེ་སྡུག་ཏུ་འགྲོ་བཞིན་པའི་སྐོར་ཚང་མས་མཁྱེན་བཞིན་པས། བསྐྱར་ལྡབ་ཞུ་མི་དགོས་ཐོག  ད་བར་བོད་བསྟན་སྲིད་མི་རིགས་ཀྱི་ཆེད་དུ་བོད་ནང་རང་ལུས་མེར་བསྲེགས་གནང་མཁན་ཤེས་རྟོགས་ར་འཕྲོད་བྱུང་བ་རྒྱལ་གཅེས་དཔའ་བོ་དཔའ་མོ་མི་གྲངས་ ༡༠༧ བྱུང་བ་ནས་མི་གྲངས་ ༨༩ འདས་གྲོངས་སུ་གྱུར་ཡོད་པ་དང་། དེ་བཞིན་བཙན་བྱོལ་དུའང་བོད་ཀྱི་རྩ་དོན་ཆེད་རང་སྲོག་བློས་གཏོང་གནང་མཁན་མི་ཉུང་བ་བྱུང་ཡོད། རྒྱ་གཞུང་གིས་རང་ལུས་མེར་བསྲེགས་གནང་མཁན་དང་འབྲེལ་བ་ཡོད་པར་བསྙད་བཏགས་ཏེ་བོད་མི་མང་དག་ཅིག་འཛིན་བཟུང་གིས་ཁྲིམས་ཐོག་ནས་ཉེས་ཆད་གཅོད་རྒྱུ་ལ་སོགས་པའི་དམ་དྲག་དང་བརྙས་གཙེར། སྡུག་སྦྱོང་ཚོད་མེད་གཏོང་བཞིན་པ་དེས་རྒྱ་ནག་གཞུང་ལ་དངོས་ཐོག་བདེན་འཚོལ་གྱིས་བོད་མིའི་མངོན་འདོད་བསྐང་རྒྱུའི་བསམ་བློ་རྩ་བ་ནས་མེད་པ་གསལ་པོ་ཆགས་ཡོད།

བོད་ནང་གི་དངོས་ཡོད་གནས་སྟངས་འགེབས་སྦས་ཆེད། རྒྱལ་སྤྱིའི་གསར་འགོད་པ་དང་། གཞུང་དང་གཞུང་འབྲེལ་མིན་པའི་རྟོག་ཞིབ་ཚོགས་པ་ཁག་བོད་དུ་ཞིབ་འཇུག་སླད་འགྲོ་རུ་མི་འཇུག་པར། བདེན་པ་སྦས་རྐྱང་དང་རྫུན་མ་སྒྲོག་རྐྱང་ལ་ཡ་ང་བག་ཚ་མེད་པར་འཛམ་གླིང་མགོ་སྐོར་གཏོང་རྐྱང་བྱེད་པ་དེ་ནི་ཧ་ཅང་གི་ཡི་མུག་དགོས་པའི་གནས་སྟངས་ཤིག་རེད། རང་གི་ནོར་འཁྲུལ་འགེབས་སྲུང་བྱ་ཕྱིར་གཞན་ལ་སྐྱོན་བརྗོད་དང་དཀར་ནག་གོ་ལྡོག་སྟེ།  རང་ལུས་མེར་བསྲེགས་སྐོར་ནང་ཆོས་ལ་འགྲེལ་ལོག་དང་༸གོང་ས་མཆོག་དང་བཙན་བྱོལ་བོད་མིའི་སྒྲིག་འཛུགས་ཀྱིས་བརྒྱུད་སྐུལ་དང་བཙན་སྐུལ་བྱེད་ཀྱི་ཡོད་ལུགས་རྫུན་སྒྲོག་བྱེད་བཞིན་པ་མ་ཟད། བོད་ཁུལ་གྱི་རང་བསྲེགས་གྱོད་དོན་ཁྲིམས་ལྟར་ཐག་གཅོད་བྱེད་རྒྱུའི་སྐོར་གྱི་བསམ་འཆར་ཟེར་བ་སོགས་ཡིག་ཆ་འདྲ་མིན་དུ་མ་གསར་བཟོ་བྱས་པ་དེས་འཛམ་གླིང་མི་མང་བསླུ་བྲིད་བྱེད་མི་ཐུབ་ལ། རྒྱ་ནག་མི་མང་ཡང་མགོ་སྐོར་གཏོང་ཐུབ་མི་སྲིད། བོད་མིའི་སྒྲིག་འཛུགས་ཀྱིས་རང་བཙན་རྩོད་ཀྱི་མེད་པ་ཤེས་བཞིན་དུ་རང་བཙན་རྩོད་མཁན་དང་ཁ་བྲལ་བ་ལ་སོགས་པའི་སྙོན་འཛུགས་བྱེད་བཞིན་པ་དེས་རྒྱ་ནག་ཁ་བྲལ་དུ་འགྲོ་རྒྱུའི་རྨང་གཞི་རྒྱ་གཞུང་རང་གིས་འདིང་གི་ཡོད།

བོད་ནང་དུ་རང་དབང་ལུང་པ་ནང་བཞིན་ཞི་རྒོལ་བྱ་རྒྱུའི་གོ་སྐབས་གཏན་ནས་མེད་སྟབས། གཞིས་བཞུགས་བོད་མི་རྣམས་ཀྱིས་བོད་དོན་བདེན་མཐའ་གསལ་ཐབས་དང་། ༸གོང་ས་༸རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་ཐབས། རྒྱ་གཞུང་གི་གདུག་རྩུབ་སྲིད་བྱུས་མཚམས་འཇོག་ཡོང་ཐབས་སོགས་ཀྱི་ཆེད་གཞན་ལ་འཚེ་བ་ཏིལ་འབྲུ་ཙམ་མ་བྱས་པར་རང་ལུས་མེར་བསྲེགས་མ་བཏང་ཐབས་མེད་ཀྱི་གནས་སུ་གྱར་ཡོད་ཀྱང་། ད་བར་རྒྱ་གཞུང་གིས་གདུག་རྩུབ་ཆེ་རུ་གཏོང་བ་ལས་དཀའ་སེལ་གྱི་ཐབས་ལམ་གང་ཡང་བསྟེན་མེད་ལ། རྒྱལ་སྤྱིའི་སྤྱི་ཚོགས་ཀྱིས་ཀྱང་སེམས་འཚབ་དང་གདུང་སེམས་མཉམ་སྐྱེད་ཀྱི་རྣམ་འགྱུར་སྟོན་པ་ཙམ་ལས། འཛམ་གླིང་ཐོག་སྔར་བྱུང་མ་མྱོང་བའི་ད་ལྟའི་བོད་ནང་གི་ཡ་ང་བ་དང་ཛ་དྲག་གི་གནས་སྟངས་འདི་ལྟ་བུར་སུས་ཀྱང་ནུས་པ་དངོས་སུ་ཐོན་ཐུབ་པའི་འགུལ་བསྐྱོད་གནང་མ་ཐུབ་པར་བོད་མི་ཚོ་བློ་ཕམ་ཆེན་པོ་ཡོད།

བཙན་བྱོལ་དུ་ཡོད་པའི་བོད་མི་ཚོས་བོད་ནང་དུ་གནས་ཚུལ་གང་བྱུང་བ་རྣམས་ཇི་མ་ཇི་བཞིན་འཛམ་གླིང་མི་མང་ལ་ཕྱིར་བསྒྲགས་བྱ་རྒྱུ་ནི་ང་ཚོའི་སྐྱུར་ཐབས་མེད་པའི་ལས་འགན་ཞིག་ཡིན། དེ་ལྟར་བྱས་པར་བོད་ནང་གི་བོད་མི་ཚོར་རང་ལུས་མེར་བསྲེགས་གཏོང་དགོས་པའི་བརྒྱུད་བསྐུལ་བྱེད་ཀྱི་ཡོད་ལུགས་ཀྱི་རྒྱུ་མཚན་དུ་བགྲངས་ན། འཛམ་གླིང་ཕྱོགས་གཞན་གང་ནའང་གནས་ཚུལ་ཇི་བྱུང་བརྒྱུད་ལམ་ཁག་ནང་སྒྲོག་བཞིན་པ་དེ་ཚོའང་གཅིག་མཚུངས་མ་ཡིན་ནམ། བཙན་བྱོལ་བོད་མིའི་ལས་འགན་གཞི་རྩར་བཞག་སྟེ། བོད་མི་མང་སྤྱི་འཐུས་ལྷན་ཚོགས་ཀྱིས་འདས་ལོའི་ནང་ལས་འགུལ་གཞི་རྒྱ་ཆེ་བ་ཁག་ཅིག་སྣེ་ཁྲིད་པའི་ནང་ནས་ཟླ་གྲངས་ ༥ ལྷག་རིང་བདེན་པའི་མེ་ལྕེ་སྐོར་བསྐྱོད་ཀྱི་ལས་གཞི་དང་། དེ་རྗེས་ཟླ་ ༡ རིང་རྒྱ་གར་མངའ་སྡེ་སོ་སོར་བོད་དོན་གོ་རྟོགས་དང་ཞུ་སྐུལ་གྱི་ལས་འགུལ། འདི་ལོ་ཕྱི་ཟླ་དང་པོའི་ཟླ་མཇུག་དང་ ༢ པའི་ཚེས་ཤར་ལ་བཀའ་སྤྱི་གཉིས་ཀྱིས་ལྡི་ལིར་བོད་མིའི་གདུང་སེམས་མཉམ་སྐྱེད་ཀྱི་ལས་འགུལ་བཅས་འཐུས་གཙང་གོ་སྒྲིག་ཞུས་པར་འབྲེལ་ཡོད་ཕྱོགས་ཚང་མས་གདུང་སེམས་མཉམ་སྐྱེད་ངང་མཐུན་འགྱུར་དང་རྒྱབ་སྐྱོར་གནང་བ་ལ་ཐུགས་རྗེ་ཆེ་ཞུ་རྒྱུ་ཡིན། ལྷག་པར་རྒྱ་གར་གཞུང་མང་གཉིས་ནས་མཐུན་འགྱུར་དང་རྒྱབ་སྐྱོར་ཤུགས་ཆེར་གནང་བ་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། སླད་མར་ཡང་ད་ལྟའི་བོད་ནང་གི་ཛ་དྲག་གནས་སྟངས་ལྷིང་འཇགས་མ་བྱུང་བར་དང་། བོད་རྒྱའི་དཀའ་རྙོག་མ་སེལ་བར་སྐབས་བསྟུན་གྱི་ལས་འགུལ་མང་དག་ཅིག་མ་སྤེལ་ཐུ་མེད་ལ་སོང། ཚང་མས་རྒྱབ་སྐྱོར་མུ་མཐུད་ཡོང་བའི་རེ་བ་ཞུ་བཞིན་ཡོད།

འདི་ལོའི་གསུམ་བཅུའི་དུས་དྲན་དང་དུས་མཚུངས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འགོ་འཁྲིད་བརྗེ་བསྒྱུར་གྱི་དུས་སྐབས་འདིར་རྒྱ་གཞུང་གི་འགོ་འཁྲིད་ཚོར་གཉིས་ཕན་གྱི་དགོས་འདུན་ཁག་ཅིག་འདོན་རྒྱུར།
༡༽     རྒྱ་གཞུང་གིས་བོད་རྒྱའི་དཀའ་རྙོག་དེ་སེལ་འོས་པ་དང་། སེལ་དགོས་པ། སེལ་ཐུབ་པ་བཅས་ལ་ངོས་འཛིན་གྱིས་གཉིས་སྨན་དབུ་མའི་ལམ་གྱི་སྒོ་ནས་ཞི་མོལ་འཕྲལ་ནས་མྱུར་དུ་འགོ་འཛུགས་བྱ་དགོས

༢༽     ད་ལྟ་བོད་ནང་དུ་འགྲོ་བཞིན་པའི་ཛ་དྲག་གི་གནས་སྟངས་སྤྱི་དང་། རང་ལུས་མེར་བསྲེགས་ཀྱིས་བོད་མིའི་རྩ་ཆེའི་ཚེ་སྲོག་ཤོར་བཞིན་པ་རྣམས་སྐྱོབ་ཆེད། རྒྱ་ནག་གཞུང་གིས་དངོས་ཐོག་བདེན་འཚོལ་དང་བློ་གཟུ་བོའི་སྒོ་ནས་ཞིབ་འཇུག་བྱ་དགོས་པ་མ་ཟད། རྒྱལ་སྤྱིའི་གསར་འགོད་པ་དང་། གཞུང་འབྲེལ་ལམ་གཞུང་འབྲེལ་མིན་པའི་ཚོགས་པ་ཁག་བོད་ནང་འགྲོ་རུ་འཇུག་དགོས།
༣༽     རྒྱ་གཞུང་གིས་ད་ལྟའི་བོད་ནང་དུ་མཁྲེགས་བཟུང་དང་དྲག་རྩུབ་ཅན་གྱི་སྲིད་བྱུས་འཛིན་བཞིན་པ་རྣམས་འགྱུར་བ་མ་བཏང་ཚེ། རྒྱ་གཞུང་དང་བོད་མི་རིགས་དབར་འགལ་ཟླ་ཤུགས་ཆེ་རུ་འགྲོ་རྒྱུ་ཡིན་པ་གདོན་མི་ཟ་བས། དྲག་རྩུབ་ཅན་གྱི་སྲིད་བྱུས་རྣམས་མཚམས་འཇོག་ངེས་པར་དུ་བྱ་དགོས།
༤༽   ད་ལྟའི་བོད་ནང་གི་ཆེས་ཛ་དྲག་གི་གནས་སྟངས་ལ་རྒྱ་གཞུང་ནས་རྒྱུས་ལོན་ཐོག བོད་མིའི་འགྲོ་བ་མི་ཡི་ཐོབ་ཐང་དང་། ཆོས་དང་རིག་གཞུང་། སྐད་ཡིག ཁོར་ཡུག་བཅས་པ་སྲུང་སྐྱོབ་དང་། མི་རིགས་དབྱེ་འབྱེད་དང། དྲག་གནོན་མནར་གཅོད་སོགས་མཚམས་འཇོག་གིས་༸ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་མཆོག་གིས་གཙོས་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་གཏོང་དགོས།

རྒྱལ་སྤྱིའི་སྤྱི་ཚོགས་ཀྱི་ངོས་ནས་ཀྱང་བོད་མིར་སྡུག་སྦྱོང་གཏོང་བཞིན་པར་རྒྱང་བལྟ་མ་ཡིན་པར། རྒྱལ་ཁབ་ཀྱི་དབུ་འཁྲིད་རྣམ་པ་དང་གཞུང་གི་འགན་འཛིན་རྣམ་པས་ལངས་ཕྱོགས་གསལ་པོའི་སྒོ་ནས་ནུས་པ་ཐོན་པའི་བྱེད་ཐབས་ཇི་ཡོད་རྩོམ་པའི་དུས་ལ་བབས་པར་ནན་སྐུལ་ཞུ་བཞིན་ཡོད།
ང་ཚོ་བོད་མི་ནང་ཁུལ་མཐུན་ལམ་རྡོག་རྩ་གཅིག་སྒྲིལ་གྱིས་བོད་དོན་བདེན་མཐའ་གསལ་ཐབས་ཆེད། འགན་ནུས་མཉམ་སྤུངས་ཀྱིས་ལས་འགན་བསྒྲུབ་དགོས་པ་ལས། འགན་ཁུར་མེད་པའི་གཏམ་བཤད་དང་། འབྲི་རྩོམ། བརྒྱུད་ལམ་ཁག་ཏུ་དངོས་ཡོད་གནས་ཚུལ་དང་མི་མཐུན་པའི་རིགས་ཁྱབ་སྤེལ་སོགས་མིན་པར་ཁ་ཕྱོགས་གཅིག་ཏུ་བསྒྱུར་ཏེ་གཞིས་བྱེས་བོད་མི་ཡོངས་ཀྱི་མངོན་འདོད་བསྒྲུབ་ཐུབ་པའི་ཐབས་ལམ་ལ་འཇུག་དགོས་ཀྱི་སྐུལ་མ་ནན་པོ་བྱེད་བཞིན་ཡོད།

མཐའ་དོན། སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་མཆོག་གི་གསང་གསུམ་མཛད་འཕྲིན་མཐའ་དག་གི་བཀའ་དྲིན་རྗེས་སུ་དྲན་པའི་སྒོ་ནས་མགོན་པོ་གང་ཉིད་འཛམ་གླིང་སྐྱེ་འགྲོ་སྤྱི་དང་གཞིས་བྱེས་བོད་མིའི་མགོན་དཔུང་དམ་པར་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་། གང་གི་གདུལ་ཞིང་གངས་ཅན་ལྗོངས་སུ་གང་མྱུར་༸ཞབས་སོར་མངོན་པར་བཀོད་དེ་གཞིས་བྱེས་ལྷན་འཛོམས་ཡོང་བའི་སྨོན་འདུན་དང་བཅས།

བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༣ ཟླ་ ༣ ཚེས་ ༡༠ ལ།། །