ཟླ་༡༡ཚེས་༡༤ཉིན་བོད་གཞུང་ཟློས་གར་ཚོགས་ཁང་དུ། འོད་དཀར་དྲ་ཚིགས་ཀྱིས་གོ་སྒྲིག་གནང་བཞིན་པའི་བཙན་བྱོལ་བོད་ཀྱི་སྙན་ངག་སྒྲོག་སྦྱང་གི་མཇུག་མཐའི་རྟིང་རྩོད་འགྲན་བསྡུར་དེ་གནང་འདུག བྱེད་སྒོ་དེའི་སྟེང་སྐུ་མགྲོན་དུ་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱས་མཆོག་དང་། བོད་མི་མང་སྤྱི་འཐུས་ཚོགས་གཞོན་བསོད་ནམས་བསྟན་འཕེལ་མཆོག ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་སེར་སྐྱ་མི་མང་ལྔ་བརྒྱ་ཙམ་ཕེབས་འདུག

སྔོན་འགྲོ་དང་དངོས་གཞི་བཅས་རིམ་བརྒྱུད་ཀྱིས་ཁ་སང་རྟིང་རྩོད་འགྲན་བསྡུར་སྟེང་། མི་ ༨ ཡོད་པ་ལས་ཝར་ཎ་མཐོ་སློབ་ཀྱི་སློབ་མ་ཉི་མ་ཚེ་རིང་ལ་ཨང་དང་པོ་ཐོབ་སྟེ་ཧིན་སྒོར་ ༦༠༠༠༠ དང་། ནོར་གླིང་མཐོ་སློབ་ཀྱི་སློབ་མ་ཀླུ་མོ་འཚོ་ལ་ཨང་གཉིས་ཐོབ་སྟེ་སྒོར་ ༤༠༠༠༠ ། དྷ་སའི་འཛུམ་ཆུང་བཀྲ་ཤིས་ལ་ཨང་གསུམ་པ་ཐོབ་སྟེ་སྒོར་ ༢༠༠༠༠ བཅས་ཀྱི་བྱ་དགའི་གསོལ་རས་གནང་སོང་ལ། འགྲན་ཞུགས་པ་གཞན་ལྔ་ལ་ཧིན་སྒོར་༢༠༠༠ རེ་ཡི་ཕུལ་བྱུང་བྱ་དགའ་དང་གཟེངས་བསྟོད་ལག་ཁྱེར་བཅས་སྤྲད་སོང་།

ཐོག་མར་བོད་ནང་བདེན་དོན་འཐབ་རྩོད་ཆེད་སྐུ་སྲོག་ཕུལ་བའི་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་ངག་བཅད་དང་། བོད་རྒྱལ་ཁབ་ཆེན་པོའི་རྒྱལ་གླུ་བླངས་ཏེ་འགྲན་བསྡུར་དངོས་སུ་དབུ་བཙུགས་གནང་རྗེས། ཐེངས་འདིའི་སྙན་ངག་གྱེན་འདོན་འགྲན་བསྡུར་གྱི་སྣེ་འཁྲིད་པ་ཤིང་བཟའ་རིན་པོ་ཆེ་མཆོག་གིས་ངོ་སྤྲོད་གསུང་བཤད་གནང་དོན། “༢༠༠༨ ལོར་བོད་ནང་གི་༼ བོད་མིའི་སྐྱིད་སྡུག་མཉམ་མྱོང་ ༽ཟེར་བའི་ཚིག་གཅིག་གིས་ང་ཚོ་བོད་ཕྱི་ནང་གཉིས་ཀར་སྐུལ་ལྕགས་ག་ཚོད་ཅིག་ཐེབས་ཡོད་མེད་ཚང་མས་མཁྱེན་གསལ་རེད། ང་ཚོས་བཙན་བྱོལ་དུ་ལོ་ངོ་ ༥༠ ལྷག་གི་རིང་སྐད་བརྒྱབ་ཡོད་པ་རེད། ཆེ་ས་ནས་ཚོགས་པ་ཁག་དང་ཆུང་ས་ནས་མི་མང་སོ་སོའི་གོ་སྒྲིག་འོག་སྐད་བརྒྱབ་ཡོད། ཡིན་ནའང་། ང་ཚོས་བོད་གཞིས་བྱེས་གཉིས་ལ་ཁྱབ་ཐུབ་པའི་ཚིག་གྲུབ་ཐུང་ཐུང་ཞིག་ཀྱང་བཟོས་མེད་པའི་གནད་གང་ལ་ཐུག་ཡོད་མེད་ཀྱི་དྲི་བ་དེ། ང་ཚོས་རང་ཉིད་ལ་འགོད་དགོས་པ་ཞིག་ཆགས་ཡོད” ཅེས་གསུང་ཏེ། ང་ཚོའི་འཐབ་བརྩོད་ནི་མི་རིགས་ཀྱི་ཐོབ་ཐང་དང་སྐད་ཡིག་གི་ཐོབ་ཐང་ཡིན་སྟབས།  ཐོབ་ཐང་དེ་གླེང་བ་ལ་དང་ཐོག་སོ་སོའི་ངོས་ནས་རང་ཉིད་ཀྱི་སྐད་ཡིག་ཤེས་པའི་ཐོག་གླེང་དགོས་ཤིང་། རང་ཉིད་ཀྱིས་མ་ཤེས་པར་བོད་སྐད་ཡིག་གི་ཐོབ་ཐང་གླེང་རྒྱུ་ནི་ངོ་ཚ་ཡིན་ཞིང་། རང་ཉིད་ཀྱི་སྐད་དང་རིག་གཞུང་ཤེས་པའི་ཐོག་ནས་འཛམ་གླིང་གི་སྒང་སྐད་ཡིག་བདག་དབང་རྩོད་ལེན་བྱས་ན་དོན་ལ་གནས་ཚུལ་གསུངས་སོང་ལ། ད་ཆར་བོད་ནང་ཤེས་ཡོན་པར་ཧ་ཅང་དམ་དྲག་ཆེན་པོ་ཡིན་པ་དེ། ཤེས་ཡོན་འཐབ་རྩོད་གནད་འགག་ཅིག་ཡིན་པ་སྟོན་གྱི་ཡོད་པས། བཙན་བྱོལ་ནང་ཤེས་ཡོན་འཐབ་རྩོད་ཐོག་གཙིགས་ཆེན་བྱ་དགོས་སྐོར་གསུངས་སོང་།

ཐེངས་འདིའི་རྟིང་རྩོད་འགྲན་བསྡུར་ལ་བརྒྱ་ཆ་སྤྲོད་མཁན་དཔྱད་འདེམས་པ་རྣམས་ནི་ཝ་ཎ་བོད་ཀྱི་མཐོ་སློབ་ཀྱི་དགེ་རྒན་སྤྱི་ཟུར་བེ་རི་འཇིགས་མེད་དབང་རྒྱལ་དང་། སྒྱུ་རྩལ་བ་སྤྲེལ་ནག་པ་བློ་གྲོས་དཔལ་བཟང་། རྩོམ་པ་པོ་བུ་ཆུང་བསོད་ནམས། སྙན་ངག་པ་གཟུངས་ཕྱུག་སྐྱིད་བཅས་ཡིན་པ་དང་། དཔྱད་འདེམས་པ་བུ་ཆུང་བསོད་ནམས་ལགས་ཀྱིས་ཐེངས་འདིའི་འགྲན་ཚོགས་དང་འབྲེལ་ཏེ་རང་ཉིད་ཀྱི་སེམས་ཚོར་བརྗོད་དོན། “ད་ཐེངས་ཀྱི་སྙན་ངག་སྒྲོག་སྦྱང་འདི་བཙན་བྱོལ་ནང་ཐེངས་དང་པོ་ཆགས་ཡོད་པར་མ་ཟད་འགྲན་བསྡུར་ཀྱི་སྤུས་ཀའང་ཧ་ཅང་ཡག་པོ་རེད། སྤྱིར་དགའ་པོ་བྱུང་བའི་ཉིང་བཅུད་ཀྱི་སྙན་ངག་ཡིན་ན་འདྲ།  སྡུག་པོ་བྱུང་བའི་ཉིང་བཅུད་ཀྱི་སྙན་ངག་ཡིན་ན་འདྲ། མདོར་བསྡུས་ན་མི་ཚེའི་ཟང་ཟིང་ཚང་མ་མཚོན་པའི་ཉིང་བཅུད་དེ་སྙན་ངག་རེད། དེ་རིང་ང་ཚོ་འདིར་ཕེབས་མཁན་ཚོའི་ཁྲོད་ན་སྙན་ངག་འབྲི་མྱོང་མེད་མཁན་རྣམས་ཀྱིས་སྙན་ངག་འབྲི་མགོ་བརྩམས་ཏེ། ནམ་རྒྱུན་ཆང་དང་ཐ་མག་གིས་ར་བཟི་རྒྱུ་མཚམས་བཞག་སྟེ་སྙན་ངག་གིས་ར་བཟི་རུ་བཅུག་པ་ཡིན་ན་མཉེས་པོ་ཞེ་དྲག་ཡོད་པ་རེད། དེ་བཞིན་སྙན་ངག་འབྲི་བཞིན་པ་ཚོས་མུ་མཐུད་དུ་སྙན་ངག་བྲིས་ཏེ་སྙན་ངག་གི་བཟི་ཁ་ཡལ་མ་འཇུག་རོགས།” ཞེས་བརྗོད་སོང་།

བྱ་དགའ་ཨང་དང་པོ་ཐོབ་མཁན་ཝ་ཎ་མཐོ་སློབ་ཀྱི་སློབ་བུ་ཉི་མ་ཚེ་རིང་ལགས་སུ་བྱ་དགའ་ཐོབ་རྗེས་སེམས་ཚོར་ག་རེ་བྱུང་མིན་དང་ཐེངས་འདིའི་འགྲན་བསྡུར་ཐད་བསམ་ཚུལ་ག་རེ་ཡོད་མེད་དྲིས་པར།  ཁོང་གིས “སྤྱིར་བཏང་མི་སུ་འདྲ་ཞིག་ཡིན་ཡང་སོ་སོས་དཀའ་ལས་བརྒྱབ་པ་དེར་འབྲས་བུ་ཞིག་ཐོན་པ་ཡིན་ན་དགའ་ཚོར་ཡོང་གི་རེད། ཡིན་ནའང་། དེ་ནི་དུས་ཐུང་གི་དགའ་ཚོར་ཙམ་རེད།  ཤིང་བཟའ་རིན་པོ་ཆེ་ཡིས་མགོ་ཁྲིད་པའི་འོད་དཀར་དྲ་ཚིགས་ཀྱིས་བཙན་བྱོལ་སྤྱི་ཚོགས་ནང་ཐེངས་དང་པོའི་སྙན་ངག་སྒྲོག་སྦྱོང་འགྲན་བསྡུར་འདི་འདྲ་ཞིག་གོ་སྒྲིག་གནང་བར་ཧ་ཅང་དགའ་བོ་བྱུང་། སྤྱིར་དེང་སང་སྤྱི་ཚོགས་ནང་བླ་སྤྲུལ་མང་པོ་ཞིག་ཡོད་པ་རེད། ཡིན་ནའང་འདི་ལྟ་བུའི་སོ་སོའི་རིག་གཞུང་སྲུང་སྐྱོབ་ཀྱི་བྱ་འགུལ་རྩོམ་མཁན་ཞེ་དྲག་ཁག་པོ་རེད། ང་རང་ལ་མཚོན་ནའང་སོ་སོའི་སྐད་ཡིག་རིག་གནས་ལ་མོས་པ་དང་འདུན་པ་ཡོད་པའི་ཐོག་ནས་བྱ་འགུལ་འདིའི་ཁྲོད་འཛུལ་ཞུགས་བྱས་པ་ཡིན། དེ་བཞིན་དུ་འགྲན་ཞུགས་པ་གཞན་པ་རྣམས་ཀྱང་བྱ་དགའ་ལ་རྔམས་དེ་ཡོང་བ་ཕལ་ཆེར་ཡིན་རྒྱུ་མ་རེད་བསམ་ཡོད། མ་འོངས་པར་གཞི་རིམ་སློབ་གྲྭ་ཁག་དང་། བོད་པའི་མཐོ་སློབ་ཁག་གི་ནང་དུའང་སྙན་ངག་གྱེར་འདོན་གྱིས་མཚོན་པའི་རིག་གནས་བྱ་འགུལ་མང་ཙམ་རྩོམ་ཐུབ་པ་ཡིན་ན་ཧ་ཅང་ཡག་པོ་རེད་བསམ་པའི་ཚོར་སྣང་བྱུང་། ” ཞེས་བརྗོད་སོང་།  

དེ་བཞིན་ཐེངས་འདིའི་སྙན་ངག་འགྲན་བསྡུར་ཁྲོད་བྱ་དགའ་ཨང་གཉིས་པ་ཐོབ་མཁན་ནོར་གླིང་མཐོ་སློབ་ཀྱི་སློབ་མ་ཀླུ་མོ་འཚོ་ཡིས་ཀྱང་སོ་སོའི་སེམས་ཚོར་དང་བསམ་ཚུལ་བརྗོད་དོན། “ སྤྱིར་ས་གནས་ཁག་སོ་སོ་ནས་ཡག་ཤོས་རྣམས་འདེམས་སྒྲིག་བྱས་ཏེ་བསླེབས་ཡོད་པ་རེད།  ཡིན་ནའང་།  ཁ་ཤས་ལ་གཏམ་བརྗོད་ཀྱི་རང་བཞིན་ཤུགས་ཆེན་པོ་ཡོང་གི་འདུག  སྙན་ངག་སྐྱོར་དུས་སྐད་གདངས་གཙོ་བོར་མ་བཟུང་པར་གཏམ་བརྗོད་ཀྱི་རྣམ་པ་འཁྲབ་ཡོང་དུས།  སྐབས་རེར་དེ་ལ་བརྒྱ་ཆ་མང་བ་རག་པ་དེ་འདྲའང་ཡོང་གི་འདུག  སྙན་ངག་གྱེར་འདོན་དེ་གཏམ་བརྗོད་རང་བཞིན་གྱི་རྣམ་པར་འགྱུར་སོང་བ་ཡིན་ན། དེ་ཏག་ཏག་ཅིག་འགྲིག་གི་ཡོད་ན་བསམ་གྱི་འདུག དེ་མིན་སྤྱི་ཡོངས་ཀྱི་ཆ་ནས་བཤད་ན་ཡག་པོ་འདུག  བརྒྱ་ཆ་སྤྲོད་སྟངས་ཀྱི་ཆ་ནས་ཀྱང་རང་རྩོམ་དང་གཞན་རྩོམ་གཉིས་ཀ་གྱེར་འདོན་བྱེད་དགོས་དུས། སྙན་ངག་གྱེར་མཁན་སུ་ལེགས་མིན་ཚང་མས་ཧ་གོ་ཡོང་གི་འདུག  གཞན་ཡང་། ང་རང་གི་བསམ་པར་བུད་མེད་ཚོའི་ངོས་ནས་ཀྱང་འདི་འདྲའི་གོ་སྐབས་བྱུང་སྐབས་མཉམ་ཞུགས་བྱ་རྒྱུ་གལ་ཆེན་པོ་རེད། བུད་མེད་ཚོའི་ནུས་པ་སྤྱི་ཚོགས་ནང་ལ་འཐོན་ཐུབ་པ་དང་། བུད་མེད་ཚོའི་སེམས་ཤུགས་ཀྱིས་ཕར་སྤྱི་ཚོགས་ལ་ཕན་ནུས་འདོན་ཐུབ་རྒྱུ་རེད་དྲན་སོང་།” ཞེས་བརྗོད་སོང་།