དེ་རིང་ཕྱི་ཟླ་ ༨ པའི་ཚེས་ ༨ ཉིན་གྱི་ཞོགས་པའི་ཆུ་ཚོད་ ༨ དང་ཕྱེད་ཀའི་སྟེང་དབུས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་རྒྱ་གར་དང་ཕྱི་རྒྱལ་ཡུལ་གྲི་ཁག་གི་སྐུ་མགྲོན་རྣམ་པ། དེ་བཞིན་ངྷ་ས་ཉེ་འཁོར་གྱི་སློབ་གྲྭ་ཁག་གི་སློབ་ཕྲུག་དང་། བཞུགས་སྒར་ཁུལ་གྱི་སེར་སྐྱ་མི་མང་བཅས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར་འདུ་འཛོམས་བྱུང་ཞིང་། ཆུ་ཚོད་༨།༤༥ སྟེང་ཟློས་གར་ཚོགས་པའི་རྔ་རོལ་གྱི་ཕེབས་བསུའི་ཁྲོད་༧གོང་ས་མཆོག་དང་བཀའ་བཀའ་བློན་ཁྲི་པ་གསར་པ་བློ་བཟང་སེང་གེ བཀའ་བློན་ཁྲི་ཟུར་ཟམ་གདོང་རིན་པོ་ཆེ་གསུམ་ལྷན་དུ་གསུང་ཆོས་ར་བའི་ཚོགས་དབུས་སུ་བཞུགས་ཁྲིར་འཁོད་སོང་།

དེའི་རྗེས་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་༧གོང་ས་མཆོག་ལ་མཎྜལ་རྟེན་གསུམ་འདེགས་འབུལ་ཞུས་རྗེས་བོད་ཀྱི་རྒྱལ་དར་བསྒྲེངས་འཛུགས་དང་རྒྱལ་གླུ་སྐྱོར་སོང་། ཆུ་ཚོད་ ༩ དང་སྐར་མ་ ༩ སྐར་ཆ་ ༩ སྟེང་མི་མང་འདུ་འཛོམས་དབུས་སུ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱས་མཆོག་གི་མདུན་ནས་བཀའ་བློན་ཁྲི་པ་གསར་པ་བློ་བཟང་སེང་གེ་མཆོག་གིས་མཛད་འཁུར་དང་གསང་རྒྱའི་དམ་འབུལ་ཞུས་ཏེ་དམ་དེབ་སྟེང་མཚན་རྟགས་བཀོད་སོང་།

སྔོན་འགྲོའི་མཛད་རིམ་གྲུབ་རྗེས་བཀའ་བློན་ཁྲི་ཟུར་པ་ཟམ་གདོང་རིན་པོ་ཆེ་མཆོག་གིས་འདས་པའི་བཀའ་ཤག་སྐབས་བཅུ་གཉིས་དང་བཅུ་གསུམ་གཉིས་ཀྱི་ལས་བསྡོམས་སྙིང་བསྡུས་ངོ་སྤྲོད་དང་བོད་གཞིས་བྱེས་གཉིས་སུ་མི་མང་ལ་མ་འོངས་ལས་དོན་བྱེད་ཕྱོགས་ཐད་ཀྱི་གསུང་བཤད་གནང་ཞིང་བཀའ་ཤག་གི་བཀའ་ཐམ་དེ་བཀའ་བློན་ཁྲི་པ་བློ་བཟང་སེང་གེ་མཆོག་གི་ཕྱག་ཏུ་ཕུལ་སོང་།   

སྐབས་དེར་ཁྲིམས་ཞིབ་པ་རྣམ་པ་དང་སྤྱི་འཐུས་ཚོགས་གཙོ་གཞོན། བཀའ་བློན་ཁྲི་ཟུར་དང་བཀའ་བློན་རྣམ་པ། སྲི་ཞུ་ལས་བྱེད་པའི་སྐུ་ཚབ་བཀའ་དྲུང་བཅས་ཀྱིས་བཀའ་བློན་ཁྲི་པ་བློ་བཟང་སེང་གེ་མཆོག་ལ་འཚམས་འདྲིའི་མཇལ་དར་སྒྲོན་འབུལ་བཅས་གནང་རྗེས། ༸གོང་ས་མཆོག་གིས་གསུང་བཤད་གནང་སོང་། ཁོང་སྐུ་ཉིད་རང་ལོ་ ༡༦ སྟེང་སྲིད་སྐྱོང་བ་སྟག་བྲག་རིན་པོ་ཆེ་མཆོག་གིས་བོད་རྒྱལ་ཁབ་ཀྱི་ཆབ་སྲིད་དང་འཛིན་སྐྱོང་གི་སྐུ་དབང་དང་ལས་འགན་ཆ་ཚང་རྩིས་སྤྲོད་གནང་བ་ལྟར། འདས་པའི་མི་ལོ་ ༥༠ ལྷག་གི་རིང་བོད་ཀྱི་བདེན་པའི་འཐབ་རྩོད་ཆེད་དཀའ་བ་ཁྱད་དུ་བསད་དེ་མང་གཙོའི་ལམ་བུ་གསར་གཏོད་བྱས་ཏེ་རང་ནུས་གང་ཡོད་ཀྱིས་ལས་དོན་བསྒྲུབས་ཏེ་རང་མགོ་འཐོན་པའི་གནས་སུ་བསྐྱལ་ཡོད་སྟབས། ཐེངས་འདིར་མི་མང་གིས་མང་གཙོའི་འོས་བསྡུའི་ལམ་ནས་བདམས་ཐོན་བྱུང་བའི་སྲིད་སྐྱོང་བ་བློ་བཟང་སེང་གེ་ལགས་སུ་ངོས་ཀྱིས་ཆབ་སྲིད་ཀྱི་འགན་དབང་ཆ་ཚང་རྩིས་སྤྲོད་གནང་གི་ཡོད། ཡུན་རིང་སྙིང་དུ་བརྣགས་པའི་འདོད་པའི་དོན་དེ་རིང་དངོས་སུ་འགྲུབ་པ་རེད་ཅེས་གསུངས་སོང་ལ། མཐའ་མར་སྲིད་སྐྱོང་བ་བློ་བཟང་སེང་གེ་ལགས་ཀྱིས་འདས་པའི་བཀའ་ཤག་རིམ་པའི་ལས་དོན་བྱེད་ཕྱོགས་དང་། མ་འོངས་པར་བོད་ཕྱི་ནང་གཉིས་དང་འཛམ་གླིང་ཡུལ་གྲུ་གང་སར་ཡོད་པའི་བོད་མི་ཚོས་རྡོག་རྩ་གཅིག་ཏུ་བསྒྲིལ་ཏེ་༸གོང་ས་མཆོག་ཕྱིར་བོད་ནང་གདན་ཞུ་གནང་རྒྱུ་དང་། བོད་གཞིས་བྱེས་གཉིས་ལྷན་འཛོམས་ཡོང་ཐབས་སུ་རང་ནུས་ཡོད་དགུ་འདོན་རྒྱུ་ཡིན་པའི་དམ་བཅའ་དང་བཅས་གསུང་བཤད་གནང་སོང་། དེའི་རྗེས་༧གོང་ས་མཆོག་དང་བཀའ་བློན་ཁྲི་པ་བློ་བཟང་སེང་གེ་རྣམ་གཉིས་ལྷན་བཞུགས་ཀྱིས་སྐུ་པར་སྒྲོན་འབུལ་ཞུས་རྗེས་༧གོང་ས་མཆོག་ཕོ་བྲང་དུ་ཆིབས་སྒྱུར་བསྐྱངས་སོང་།

སྲིད་སྐྱོང་ཁྲི་པའི་མཛད་ཁུར་དམ་བཅས་ཀྱི་གསུང་བཤད།

དེ་རིང་ཕྱི་ཚེས་ ༨ ཉིན་ཞོགས་པའི་ཆུ་ཚོད་ ༧ པའི་སྟེང་བཀའ་བློན་ཁྲི་པ་བློ་བཟང་སེང་གེ་མཆོག་གིས་གནས་ཆུང་གྲྭ་ཚང་དང་དགའ་གདོང་གྲྭ་ཚང་བཅས་སུ་མཆོད་མཇལ་ཞུས་རྗེས།  ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་མཆོག་དབུ་བཞུགས་ཐོག  དབུས་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བའི་མདུན་ནས་བཀའ་བློན་ཁྲི་པའི་མཛད་འཁུར་དང་གསང་རྒྱའི་དམ་འབུལ་གནང་རྗེས། བཀའ་བློན་ཁྲི་པའི་ལས་ཁུར་མགོ་འཛུགས་གསུང་བཤད་གནང་སོང་ལ། དེ་བཞིན་ཆུ་ཚོད་ ༡༡ སྟེང་གངས་སྐྱིད་ཀྱི་བཀའ་ཤག་ཐོག་ཁང་གསར་བའི་ཚོགས་ཁང་དུ། བཀའ་ཁྲིའི་ལས་ཁུར་དངོས་སུ་བཞེས་རྗེས་ཀྱི་གསར་འགོད་ལྷན་ཚོགས་ཐོག་མ་དེ་བསྐྱངས་ཏེ། བོད་པ་དང་རྒྱ་གར་གཙོས་པའི་འཛམ་གླིང་གི་གསར་འགོད་པ་ ༥༠ ལྷག་གི་དྲི་བར་ལན་འདེབས་གནང་སོང་།

བློ་བཟང་སེང་གེ་མཆོག་གིས་བཀའ་ཁྲིའི་དམ་འབུལ་གསུང་བཤད་གནང་དོན། "དེ་རིང་བོད་གངས་ཅན་གྱི་ལྗོངས་སུ་དམ་པའི་ལྷ་ཆོས་ཀྱི་སྣང་བ་སྤེལ་མཁན་རྒྱ་གར་གྱི་སློབ་དཔོན་ཆེན་པོ་པདྨ་འབྱུང་གནས་སྐུ་འཁྲུངས་པའི་དུས་ཚིགས་ཁྱད་པར་ཅན་འདིར། ༸གོང་ས་མཆོག་ལ་གུས་ཕྱག་དང་བཀའ་དྲིན་རྗེས་སུ་དྲན་པའི་སྒོ་ནས། ཕྲན་གྱིས་གུས་པ་ཆེན་པོའི་བཀའ་བློན་ཁྲི་པའི་ལས་འཁུར་དང་ལེན་ཞུ་རྒྱུ་ཡིན་ལ། གུས་པར་བཙན་བྱོལ་བོད་མི་ཡོངས་ནས་རྒྱབ་སྐྱོར་ཤུགས་ཆེན་གནང་བ་མ་ཟད། བཙན་འོག་ཏུ་ཡོད་པའི་བོད་རིགས་སྤུན་ཟླ་ཚོས་ཀྱང་སྨོན་འདུན་དང་འཚམས་འདྲིའི་ལམ་ནས་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། དེ་རིང་ལོ་རྒྱུས་རང་བཞིན་ལྡན་པའི་༸གོང་ས་ཏཱ་ལའི་བླ་མ་མཆོག་གི་རླབས་ཆེན་སྒྲིག་འཛུགས་འདིའི་ཁྲིམས་མཐུན་གྱི་ངོ་བོ་རྒྱུན་མཐུད་རྒྱུའི་གོ་སྐབས་ཐོབ་པ་འདི་ནི། བོད་གཞིས་བྱེས་གཉིས་ཀྱི་མི་རབས་གོང་མ་ཚོའི་དཀའ་སྤྱད་སྙིང་རུས་དང་བློས་གཏོང་ལས་བྱུང་བའི་འབྲས་བུ་ཡིན་པར་བརྟེན། ཇི་སྲིད་བོད་ནང་རང་དབང་བསྐྱར་གསོ་མ་བྱུང་གི་བར་དུ། མེས་པོ་གོང་མ་ཚོས་བཞག་པའི་བོད་དོན་བདེན་པའི་འཐབ་རྩོད་མུ་མཐུད་སྲ་བརྟན་རྒྱུན་གནས་ཡོང་ཐབས་དང་། ༸གོང་ས་མཆོག་བོད་ནང་ཞབས་སོར་འཁོད་ཐུབ་པ་ཡོང་ཆེད་འབད་བརྩོན་སྒོ་ཀུན་ནས་ཞུ་རྒྱུའི་ཁས་ལེན་ཞུ་རྒྱུ་ཡིན།" ཅེས་གསུངས་སྟེ། བཀའ་ཁྲི་ཉིད་ཀྱི་ངོས་ནས་དོན་དམ་པའི་ཆོས་ལུགས་རིས་མེད་ཀྱི་དམངས་གཙོའི་སྤྱི་ཚོགས་ཤིག་བསྐྲུན་རྒྱུའི་ྋགོང་ས་མཆོག་གི་ཐུགས་བཞེད་བསྒྲུབ་ཐབས་ཞུ་རྒྱུ་ཡིན་པའི་ཁས་ལེན་བཅས་གནང་སོང་།

དེ་བཞིན་དམ་འབུལ་གསུངས་བཤད་སྐབས། བཀའ་ཁྲི་མཆོག་གིས་ང་ཚོའི་འཐབ་རྩོད་ནི་རྒྱ་ནག་མི་མང་ངམ་རྒྱ་ནག་རྒྱལ་ཁབ་ཀྱི་ཁ་གཏད་དུ་ལངས་པ་ཞིག་མ་ཡིན་པར། རྒྱ་ནག་དབང་འཛིན་པས་བོད་ནང་ལག་བསྟར་བྱས་པའི་མཁྲེགས་འཛིན་གྱི་སྲིད་བྱུས་དེ་དག་ལ་ངོ་རྒོལ་དང་། ང་ཚོས་རང་དབང་དང༌། དྲང་བདེན། ཆེ་མཐོང༌། དེ་བཞིན་བོད་མིའི་ངོས་འཛིན་བཅས་ཀྱི་ཆེད་འཐབ་རྩོད་བྱེད་བཞིན་ཡོད་པ་དང་། བོད་རྒྱ་མི་རིགས་གཉིས་ཀའི་ཁེ་ཕན་ཆེད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་ནང་མིང་དོན་མཚུངས་པའི་རང་སྐྱོང་ཡོང་ཐབས་སུ་དབུ་མའི་ལམ་གྱི་སྲིད་བྱུས་མུ་མཐུད་རྒྱུན་འཛིན་གྱིས། ཞི་མོལ་གྱི་ལམ་ནས་བོད་དོན་འགྲིག་འཇགས་འཚོལ་རྒྱུའི་ཡིད་ཆེས་བྱེད་ཀྱི་ཡོད་པས། ས་གནས་དང་དུས་ཚོད་གང་འདྲ་ཞིག་ཏུ་ཡིན་ཡང་རྒྱ་གཞུང་དང་གྲོས་མོལ་བྱ་རྒྱུའི་གྲ་སྒྲིག་ཡོད་པའི་གསལ་འདེབས་དང་། རྒྱ་གར་གཞུང་དང་ཨ་རི། ཡུ་རོབ་ཀྱིས་མཚོན་པའི་རྒྱལ་སྤྱིའི་སྤྱི་ཚོགས་དང༌། བོད་དོན་རྒྱབ་སྐྱོར་ཚོགས་པ་རྣམས་ཀྱིས་མུ་མཐུད་རྒྱབ་སྐྱོར་གནང་སྟེ། པེ་ཅིན་གཞུང་ལ་བོད་ཀྱི་གནད་དོན་དེ་ཞི་བའི་སྒོ་ནས་སེལ་ཐབས་ཀྱི་བསྐུལ་ལྕག་གནང་དགོས་པའི་འབོད་སྐུལ་ཡང་གནང་སོང་།

བཀའ་ཁྲི་གསར་པའི་མ་འོངས་ལས་འཆར་ནང་དུ། འབྱུང་འགྱུར་ལོ་ལྔའི་རིང་ཆིག་སྒྲིལ་དང༌གསར་གཏོད། རང་ཁ་རང་གསོ་བྱ་རྒྱུའི་ལྟ་གྲུབ་ལ་བརྟེན་ཏེ། མ་འོངས་པར་བོད་མིའི་རང་དབང་འཐབ་རྩོད་ཀྱི་ལས་འགུལ་ད་དུང་ལོ་ལྔ་བཅུར་གནས་དགོས་ཀྱང་མུ་མཐུད་སྲ་བརྟན་རྒྱུན་གནས་ཐུབ་པ་དང༌། གཞིས་བཞུགས་བོད་མིར་གདུང་སེམས་མཉམ་སྐྱེད་མཚོན་ཆེད། བོད་མིའི་ངོ་བོ་སྲུང་སྐྱོབ་བྱེད་པའི་“ལྷག་དཀར”གྱི་ལས་འགུལ་ལ་རྒྱབ་སྐྱོར། འཛམ་གླིང་གང་སར་ཁ་བཀྲམས་ཏེ་གནས་པའི་བཙན་བྱོལ་བོད་མིའི་སྤྱི་ཚོགས་དང་སྒྲིག་འཛུགས་ཁག་སྲ་བརྟན་ཡོང་ཐབས་སུ་སྒུལ་ཤུགས་ལྡན་པའི་ཁོར་ཡུག་ཅིག་བསྐྲུན་ཐུབ་བྱ་རྒྱུ་མ་ཟད། ཤེས་ཡོན་ཡར་རྒྱས་གཏོང་རྒྱུ་དེ་ལས་དོན་གལ་ཆེ་ཤོས་སུ་བརྩིས་ནས་འབྱུང་འགྱུར་ལོ་ ༢༠ ནང༌། བཙན་བྱོལ་བོད་མི་ཆིག་འབུམ་ལྷག་གི་ནང་ནས་ཁྱད་ལས་པ་ ༡༠༠༠༠ འཐོན་ཐུབ་པའི་དམིགས་ཚད་དང༌། བོད་ནང་ཁྱད་ལས་པ་ ༡༠༠༠༠༠ འཐོན་ཐུབ་རྒྱུའི་རེ་སྐུལ་ཞུ་རྒྱུ། འཛིན་སྐྱོང་གི་ལས་དོན་བྱེད་ཕྱོགས་ཐད་ཕྱི་གསལ་ནང་གསལ་དང༌མང་ཚོགས་མཉམ་ཞུགས་ཀྱི་ནུས་པ་ཆེ་རུ་གཏོང་རྒྱུ། དེ་བཞིན། འབྱུང་འགྱུར་ལོ་ལྔ་བཅུའི་འཕྲལ་ཕུགས་ཀྱི་འཆར་སྣང་ཐད།མཁས་པ་དང་ཤེས་ཡོན་ཅན་ཚོའི་ཐབས་བྱུས་དང༌རྣམ་དཔྱོད་འདོན་སའི་སྡིངས་ཆ་བསྐྲུན་ཆེད། བོད་ཀྱི་སྲིད་བྱུས་ཞིབ་འཇུག་ཁང་ཞིག་འཛུགས་རྒྱུ། གཞིས་ཆགས་རེ་དང་བོད་རིགས་སྤྱི་མཐུན་ཚོགས་པ་རེ་མགོ་སྦྲེལ་གྱི་ལམ་ནས་རྒྱ་བལ་འབྲུག་གསུམ་དང་། ནུབ་ཕྱོགས་རྒྱལ་ཁབ་ཁག་ནང་ཡོད་པའི་བོད་རིགས་ཚོའི་བར་མཐུན་འགྱུར་བྱེད་ཐབས་ཀྱི་འབྲེལ་བ་འཛུགས་རྒྱུ་དང་། "བོད་ཀྱི་མཉམ་སྡེབ"ཅེས་པ་གསར་འཛུགས་ཀྱིས་རྒྱ་གར་དང་ཕྱི་རྒྱལ་དུ་ཡོད་པའི་བོད་རིགས་ཤེས་ཡོན་ཅན་ཚོའི་ནུས་པ་འགུག་ཐབས་བྱས་ཏེ། གཞོན་སྐྱེས་ཚོར་ལས་འཚོལ་གྱི་གོ་སྐབས་དང༌། གཞིས་ཆགས་ཁག་སྲ་བརྟན་ཡོང་ཐབས་བཅས་བྱ་རྒྱུ་ཡིན་པ་གསུངས་སོང་།

བཀའ་ཁྲི་མཆོག་གིས་དམ་འབུལ་གསུངས་བཤད་ཀྱི་མཐའ་བསྡོམས་སུ། མ་འོངས་པར་གངས་ལྗོངས་ཆོས་ལྡན་ཞིང་དུ་གཞིས་བྱེས་བོད་མི་མཉམ་འཛོམས་ཡོང་རྒྱུ་དང་། ༸གོང་ས་མཆོག་ལྷ་ལྡན་གྲོང་ཁྱེར་དུ་ཆིབས་ཞབས་བསྒྱུར་རྒྱུའི་ལོ་རྒྱུས་རང་བཞིན་ལྡན་པའི་འགྲུལ་བཞུད་དེ་མགོ་འཛུགས་རྒྱུའི་གྲ་སྒྲིག་ཆ་ཚང་ཡོད་པ་ཅེས་སོགས་གསུངས་སོང་།

བཀའ་ཤག་གསར་པའི་ཚོགས་ཁང་དུ་གསར་འགོད་པས་དེ་རིང་༸གོང་ས་མཆོག་དང་བཀའ་བློན་ཁྲི་ཟུར་ཟམ་གདོང་རིན་པོ་ཆེ་རྣམ་གཉིས་ཀྱི་གསུང་བཤད་ནང་"སྲིད་སྐྱོང" ཞེས་པའི་ཐ་སྙད་གསར་དུ་བེད་སྤྱོད་གནང་པའི་ཐད་དགོངས་ཚུལ་གང་ཡོད་བཀའ་འདྲི་གནང་བའི་ལན་དུ་ཁོང་གིས། "ད་ལྟའི་ཆར་ང་རང་བཀའ་བློན་ཁྲི་པ་རེད། མ་འོངས་པར་སྲིད་སྐྱོང་དང་བཀའ་བློན་ཁྲི་པ་གང་ཆགས་མིན་གྲོས་ཚོགས་ལ་རག་ལས་ཡོད་པ་རེད། དེ་རིང་གཙོ་ཆེ་ཤོས་མི་མང་རང་ལ་གསུངས་བཤད་གནང་བ་ཡིན་པས། མི་མང་ལ་དགོངས་ཚུལ་ག་རེ་ཡོད་པ་དེ་གཞིར་བཞག་པའི་ཐོག་ནས་འགྲོ་དགོས་ཀྱི་ཡོད། ང་རང་ཡང་མི་མང་གིས་བདམས་པའི་མགོ་ཁྲིད་ཅིག་ཆགས་ཡོད་སྟབས། མི་མང་གི་བསམ་ཚུལ་ལྟར་གྲོས་ཚོགས་ཀྱིས་ཐག་གཅོད་ག་རེ་གནང་པ་དེར་མོས་མཐུན་གཙང་མ་ཞུ་རྒྱུ་ཡིན། "ཞེས་གསུངས་སོང་།

བཀའ་ཁྲི་གསར་པར་རྟེན་འབྲེལ་ཞུ།

      དེ་རིང་ཕྱི་ཚེས་ ༩ ཉིན་གྱི་སྔ་དྲོར་བཞུགས་ སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། དབུས་བོད་མིའི་སྒྲིག་འཛུགས་ཀྱི་སྐབས་གསུམ་པའི་བཀའ་བློན་ཁྲི་པ་བློ་བཟང་སེང་ གེ་མཆོག་ལ་བཀྲ་ཤིས་བདེ་ལེགས་ཀྱི་འཚམས་འདྲི་ཞུ་བའི་རྟེན་ འབྲེལ་མཛད་སྒོ་ཞིག་ཚོགས་ཡོད་ཅིང་། མཛད་སྒོ་དེར་ཕྱི་རྒྱལ་དང་རྒྱ་གར་བོད་དོན་རྒྱབ་སྐྱོར་ཚོགས་པའི་སྐུ་ཚབ་དང་། བོད་གཞུང་གི་ལས་ཁུངས་ཁག་གི་དྲུང་ཆེ་དང་འགན་འཛིན། སྤྱི་འཐུས་རྒྱུན་ལས། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། དགོན་སྡེ་ཁག་གི་སྐུ་ཚབ་དང་མི་མང་བཅས་ཁྱོན་མི་ ༣༠༠༠ ལྷག་འདུ་འཛོམས་བྱུང་སོང་། སྐབས་དེར་སྐུ་ཚབ་ཚོས་བཀའ་ཁྲི་གསར་པ་བློ་བཟང་སེང་གེ་མཆོག་ལ་བཀྲ་ཤིས་མཇལ་དར་ཕུལ་རྗེས། བོད་གཞུང་ཟློས་གར་དང་ཐང་སྟོང་གླུ་གར་ཚོགས་པ། སློབ་གྲྭ་ཁག་གི་སློབ་ཕྲུག་བཅས་ཀྱི་གླུ་གཞས་གཟིགས་འབུལ་ཞུས་ཡོད།

      དེའི་རྗེས་ཁལ་མིག་གྲོས་ཚོགས་ཀྱི་ཚོགས་གཞོན་དང་། མཱོ་སཱི་ཁོ་བོད་སྐྱོབ་དགེ་རྩ་ཁང་གི་འགའ་འཛིན། ཐེ་ཝན་མང་གཙོ་ཚོགས་པའི་གྲོས་ཚོགས་འཐུས་མི། སོག་ཡུལ་གྱི་གྲོས་ཚོགས་འཐུས་མི། བལ་ཡུལ་གྲོས་ཚོགས་འཐུས་མི། རྒྱ་གར་བོད་དོན་རྒྱབ་སྐྱོར་ཚོགས་ པའི་རྒྱལ་ཡོངས་བཀོད་འདོམས་པ། བྷེལ་ཇམ་ཡུ་རོབ་སྤྱི་མཐུན་ཚོགས་པའི་གྲོས་ཚོགས་འཐུས་མི། ཨ་རྒྱ་འབྲེལ་མཐུད་ཚོགས་པའི་ཚོགས་གཙོ། ངྷ་ས་ཧིན་བོད་མཛའ་འབྲེལ་ཚོགས་པའི་ཚོགས་གཙོ། ཧྥུ་རི་ཆི་ནོའོ་མིན་ Friedrich Naumnan foundation ཚོགས་པའི་ངེས་སྟོན་པ།  དེ་ བཞིན། ཨི་ཊ་ལི་གྲོས་ཚོགས་འཐུས་མི་དང་རྒྱལ་སྤྱིའི་གྲོས་ཚོགས་བོད་དོན་འབྲེལ་མཐུད་ ཚོགས་པའི་ཚོགས་གཙོ་བཅས་ཀྱིས། བཀའ་ཁྲི་གསར་པ་བློ་བཟང་སེང་གི་མཆོག་ལ་དམིགས་བསལ་འཚམས་འདྲི་དང་བོད་དོན་དང་འབྲེལ་བའི་གཏམ་ བཤད་གནང་སོང་ལ། མཇུག་ཏུ་བཀའ་ཁྲི་བློ་སེང་གེ་མཆོག་གིས་འཛམ་གླིང་ཕྱོགས་མཐའ་ཁག་ནས་ཕེབས་པའི་ སྐུ་མགྲོན་ཚོར་མ་འོངས་པར་མུ་མཐུད་བོད་ཀྱི་གནད་དོན་ཐོག་རྒྱབ་སྐྱོར་ཡོང་བར་ འབོད་སྐུལ་ཞུས་སོང་།  

      ཐེངས་ འདི་ནི་བཀའ་བློན་ཁྲི་པ་བློ་བཟང་སེང་གེ་མཆོག་གིས་བཀའ་ཁྲིའི་མཛད་འགན་བཞེས་ཏེ། གཞུང་འབྲེལ་ཐོག་མཛད་འཕྲིན་བསྐྱངས་པ་ཐོག་མ་དེ་ཆགས་ཡོད།