བཀའ་ཁྲི་གསར་བ་བློ་བཟང་སེང་གེ་མཆོག་གི་འཚམས་འདྲི།

    བཀའ་བློན་ཁྲི་པའི་འོས་འདེམས་ཀྱི་ལས་རིམ་ལ་བོད་མི་ཚོས་རྒྱབ་སྐྱོར་གནང་བར་གུས་བརྩི་ཆེན་པོས་དང་ལེན་ཞུ་རྒྱུ་དང་། འཛམ་གླིང་འདིའི་རྒྱལ་ཁབ་ ༣༠ ལྷག་ཙམ་གྱི་ནང་དུ་གནས་སྡོད་བྱེད་མཁན་བོད་མི་ ༥༠༠༠༠ མ་ཟིན་ཙམ་གྱིས། ཐེངས་འདིའི་བཀའ་སྤྱིའི་འོས་འདེམས་ཀྱི་ལས་རིམ་ནང་མཉམ་ཞུགས་གནང་ཡོད་པ་ཤེས་རྟོགས་བྱུང་སོང་བས། ཁྱེད་རྣམས་ཀྱིས་རྒྱབ་སྐྱོར་ཚད་མེད་གནང་བར་གུས་བརྩི་ཞུ་བ་དང་སྦྲགས་ཏེ། ང་སྒེར་གྱི་ངོས་ནས་ཀྱང་བོད་མི་ཚོས་ང་ལ་རེ་བ་གནང་དོན་ལྟར་གང་ནུས་ཅི་འཇོན་བྱེད་རྒྱུ་ཡིན།

ངས་བཀའ་ཁྲིའི་འོས་མིའི་ལས་རིམ་གྱི་བརྒྱུད་རིམ་ཁྲོད་ནས་ཆིག་སྒྲིལ་དང་རང་མགོ་རང་ཐོན། གསར་གཏོད་བཅས་རྩ་དོན་གསུམ་དེ་རྨང་གཞིར་བཟུང་ཡོད་པ་དང་། བཀའ་ཁྲིའི་འོས་མི་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་དང་། བཀའ་ཟུར་བཀྲིས་དབང་འདུས་ལགས་རྣམ་གཉིས་ལའང་དེ་བཞིན་དུ་མཐོང་ཆེན་བྱེད་ཀྱི་ཡོད་ལ་ཧ་ཅང་གིས་གུས་བརྩི་བྱེད་ཀྱི་ཡོད། དེ་བཞིན་ཁོང་གཉིས་ནི་མཁྱེན་རྒྱ་ཤིན་ཏུ་ཡངས་པ་དང་བོད་པའི་སྤྱི་ཚོགས་ནང་སྲི་ཞུ་བསྒྲུབས་པའི་བྱས་རྗེས་ཅན་ལ། འོས་འགྲན་གྱི་གོ་སྐབས་ཐོབ་པ་དེ་ནི་ཧ་ཅང་གི་སྐལ་བ་བཟང་པོ་ཞིག་རེད་དྲན་གྱི་ཡོད། དེ་དང་འབྲེལ་ནས་བཀའ་ཁྲི་མཁས་དབང་ཟམ་གདོང་རིན་པོ་ཆེ་མཆོག་གིས། འདས་པའི་ལོ་ ༡༠ ལ་བཀའ་ཁྲིའི་ཕྱག་ལས་གནང་ཡུན་རིང་། བོད་པའི་སྤྱི་ཚོགས་ཀྱི་གནད་དོན་གང་ཞིག་ཡིན་ནའང་སྲ་བརྟན་གནང་ཡོད་པར་སྙིང་ནས་བཀའ་དྲིན་ཆེ་ཞུ་འདོད་བྱུང་།

ད་ཐེངས་ཀྱི་བཀའ་སྤྱི་གཉིས་ཀྱི་འོས་འདེམས་ཀྱི་གྲུབ་འབྲས་དེ་སྔོན་ཆད་བྱུང་མྱོང་མེད་པ་ཞིག་ཆགས་ཡོད་པ་དང་། ད་ལྟའི་འབད་བརྩོན་གྱི་གནས་སྟངས་འདི་འདྲ་བ་བཀའ་སྤྱི་གཉིས་ཀྱི་འོས་མི་དང་འོས་བསྡུའི་ལས་ཀ་བྱེད་མཁན་ཚོས་སྔོན་ཆད་མཐོང་མྱོང་མེད་པའི་གནས་སྟངས་ཤིག་ཏུ་གྱུར་ཡོད་པ་རེད། འབད་བརྩོན་འདི་བཙན་བྱོལ་ནང་ཡོད་པའི་བོད་མི་ཚོ་གཅིག་པུ་མིན་པར། བོད་ནང་ཡོད་པའི་བོད་མི་ཚོ་ཡང་འོས་འདེམས་འདི་དང་ཉེ་པོར་གནས་ཡོད། དེ་ཡང་ངས་གོ་ཐོས་བྱུང་བ་ཞིག་ནི་འོས་འདེམས་ཀྱི་བརྒྱུད་རིམ་ཁྲོད་ནས། བོད་ནང་གི་བོད་མི་ཚོས་བསང་གསོལ་མཆོད་འབུལ་དང་ཤོག་སྦག་བརྒྱབ་པ་སོགས་ཀྱི་རྟེན་འབྲེལ་བྱས་ཡོད་པ་དང་། ང་ལ་རྟེན་འབྲེལ་མཚོན་བྱེད་དུ་བོད་ནས་ཁ་བཏགས་དང་བརྡ་འཕྲིན་སོགས་འབྱོར་སྐབས། སྙིང་ལ་ན་ཟུག་ལངས་པའི་ཚོར་སྣང་ཡོང་གི་འདུག བལ་ཡུལ་དུ་ཡོད་པའི་བོད་མི་བཙན་བྱོལ་བ་ལྟ་བུར་མཚོན་ན་བལ་ཡུལ་གཞུང་གིས་བོད་མི་ཚོའི་འོས་འཕེན་ལ་ཐེ་གཏོགས་བྱས་ཡོད་པ་དང་། བོད་མི་སྟོང་ཕྲག་མང་པོའི་འོས་འཕེན་ལ་བཀག་འགོག་བྱས་ཡོད་རུང་ད་དུང་ཡང་ཞུམ་པ་མེད་པའི་ཐོག་ནས་གནས་ཡོད་པ་དང་། རྒྱལ་ཁབ་༣༠ ལྷག་ཙམ་ནང་ཡོད་པའི་བོད་མི་ཚོས་འོས་འཕེན་ནང་མཉམ་ཞུགས་བྱས་ཡོད་པ་རེད། ངས་འོས་འདེམས་འདི་ལ་ངོས་འཛིན་བྱེད་སྟངས་ནི། ༧གོང་ས་མཆོག་གིས་དུས་ཡུན་རིང་པོའི་རིང་ལ་ཆབ་སྲིད་ཀྱི་དགོངས་པ་བཞེས་ཕྱོགས་དང་། བོད་པའི་སྤྱི་ཚོགས་དེ་མང་གཙོ་ཡང་དག་པའི་ཕྱོགས་སུ་མདུན་བསྐྱོད་བྱེད་རྒྱུའི་བཀའ་དགོངས་མངོན་དུ་གྱུར་པ་རེད་བསམ་གྱི་ཡོད།

ད་ཐེངས་བཀའ་སྤྱི་གཉིས་ཀྱི་འོས་འདེམས་ལམ་ལྷོང་བྱུང་བ་དེ། འོས་འཕེན་གྱི་ལས་རིམ་ནང་ཞུགས་མཁན་བོད་མི་ཚོའི་བཟང་སྤྱོད་ཀྱི་རྒྱལ་ཁ་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད། དེ་བཞིན་ལས་འགུལ་དེའི་ཁྲོད་ནས་ང་སྒེར་གྱིས་འགྲུལ་བསྐྱོད་ཆེན་པོ་ཞིག་བྱས་ཐུབ་ཡོད་པ་དང། རྒྱལ་ཁབ་མང་པོའི་ནང་ཡོད་པའི་བོད་མི་ཚོར་ཐུག་འཕྲད་ཀྱི་གོ་སྐབས་ཐོབ་ཡོད་པ་མ་ཟད། རྒྱ་གར་ནང་ཡོད་པའི་གཞིས་ཆགས་ཁག་མང་ཆེ་བའི་ནང་སྐོར་བསྐྱོད་ཐུབ་སོང་། བཀའ་ཁྲིའི་ལས་འགུལ་སྐབས་འབྲེལ་ཡོད་བོད་མི་ཚོར་འབྲེལ་གཏུགས་བྱས་པ་རྣམས་ལྷང་ལྷང་དྲན་གྱི་འདུག་ལ། མི་དེ་དག་གི་རེ་འདུན་དང་སྐུལ་ལྕག་བྱས་པ་རྣམས་ངའི་བསམ་བློའི་ནང་རྒྱུན་གནས་བྱས་ཏེ། གལ་གནད་ཆེ་བའི་བཀའ་ཁྲིའི་ལས་དོན་དེའི་འོས་འགན་འཁྱེར་རྒྱུར་གྲ་སྒྲིག་བྱེད་བཞིན་ཡོད།

ངས་ཆབ་སྲིད་ཀྱི་འགན་འཁུར་ལེན་པའི་སྐབས་འདི་༧གོང་ས་མཆོག་གིས་བགྲེས་ཡོལ་ཆ་ཚང་ཕེབས་རྒྱུའི་ཐུགས་ཐག་བཅད་པ་དང་། མི་མང་གིས་བདམས་པའི་མགོ་ཁྲིད་ཚོར་དབང་ཚད་ཆ་ཚང་མར་གནང་འཆར་ཡོད་པའི་སྐབས་དང་འཁེལ་ཡོད་པ་རེད། དེང་སྐབས་འཛམ་གླིང་ནང་འགྲོ་བཞིན་པའི་མེ་ཏོག་ཀུནྡ་གསར་བརྗེའི་ལས་འགུལ་ (Jasmine revolution)  ལ་མཚོན་ན། མི་རྣམས་ཀྱིས་མང་གཙོའི་ལམ་ལུགས་སྲུང་སྐྱོབ་ཀྱི་ཆེད་དུ་རང་སྲོག་བློས་བཏང་བྱེད་བཞིན་ཡོད་རུང་། ༧གོང་ས་མཆོག་གིས་བོད་མི་རྣམས་ལ་ཡིད་ཆེས་གནང་སྟེ་མང་གཙོ་མར་གསོལ་བསྩལ་གནང་ཡོད་པ་རེད། ༧གོང་ས་མཆོག་ནི་ངའི་སེམས་ཤུགས་ཀྱི་སྐུལ་ལྕག་ཡིན་ལ། ཁོང་གིས་ང་ཚོར་བསྐྱངས་པའི་དགོངས་གཞི་དེ་ལེགས་འགྲུབ་ཡོང་བར་འབད་བརྩོན་བྱ་ངེས་ཡིན་ཞིང་། ངས་ལས་དོན་འདི་དགའ་ཚོར་ཆེན་པོས་དང་ལེན་ཞུ་ཡི་ཡིན། གང་ཡིན་ཞེ་ན་ད་ལྟའི་སྐབས་༧གོང་ས་མཆོག་གི་སྐུ་གཟུགས་གསལ་ཐང་ཡིན་པ་དང་། ང་ཚོའི་ལས་དོན་གང་ལའང་ཁོང་གིས་གཟིགས་སྐྱོང་གནང་ངེས་ཡིན་པས། ང་ཚོས་དུས་ཚོད་འདི་བརྒྱུད་ནས་ཁོང་གི་དགོངས་གཞི་རེ་རེ་བཞིན་ལག་བསྟར་ཐུབ་པ་བྱེད་དགོས་ལ། དེ་བཞིན་དུ་ང་ཚོའི་མང་གཙོའི་ལམ་ལུགས་དང་གཞུང་གི་ཐོག་ནས་མ་འོངས་པར་བོད་ཀྱི་ལས་འགུལ་འདི་སྲ་བརྟན་ཡོང་བ་ལའང་གདེང་ཚོད་ཆེན་པོ་ཡོད།

འོས་འཕེན་གྱི་ལས་རིམ་ནང་ཞུགས་མཁན་ཚང་མས་ང་ཚོའི་མང་གཙོའི་ལམ་ལུགས་འདི་སྲ་བརྟན་དུ་བཏང་ཡོད་པས་ཐུགས་རྗེ་ཆེ་ཞུ་འདོད་བྱུང་ལ། ལྷག་དོན་དུ་རང་གཅེས་དང་གཞན་སྨད་སྤངས་པའི་ང་ལ་རྒྱབ་སྐྱོར་བྱེད་མཁན་ཚོས། ལས་འགུལ་རྣམས་ཚུལ་མཐུན་ལུགས་མཐུན་གྱི་ངང་ནས་སྤེལ་སོང་བས་དམིགས་བསལ་གྱིས་ཐུགས་རྗེ་ཆེ་ཞུ་འདོད་བྱུང་། འདི་དང་འབྲེལ་ནས་ངའི་རྒྱབ་སྐྱོར་བ་ཚོར་ཞུ་འདོད་པ་ཞིག་ནི། འོས་ཐོབ་ཀྱི་རྒྱལ་ཁ་འདི་མི་སྒེར་བར་རྒྱལ་ཕམ་གྱི་འཐབ་རྩོད་མིན་པ་དང་། འདི་ནི་བོད་མི་ས་ཡ་དྲུག་གིས་རེ་འདུན་ཕྲག་སྟེང་དུ་བཞག་པ་ཞིག་ཡིན་པས། འདི་ལ་སྤྲོ་སྐྱིད་སོགས་ཀྱི་གྲ་སྒྲིག་རིགས་མ་གནང་རོགས་ཞུ་རྒྱུ་ཡིན་ལ། ད་ལྟའི་སྐབས་བོད་མདོ་སྨད་ཨ་མདོ་རྔ་པ་ཁུལ་དུ། རྒྱ་ནག་གཞུང་གིས་བོད་མི་རྣམས་གསོད་རྡུང་བཙོན་འཇུག་སོགས་ཀྱི་གནས་སྟངས་ཛ་དྲག་ཆགས་ཡོད་པ་རེད། དེ་བཞིན་དུ་གནས་སྟངས་ཧ་ཅང་གི་དཀའ་ངལ་ཅན་ནང་ཡོད་པའི་བོད་ནང་གི་བོད་མི་ཚོས། ང་ལ་ཚད་ལས་བརྒལ་བའི་རྒྱབ་སྐྱོར་དང་སྙིང་སྟོབས་གནང་བར་ངས་སྙིང་ཁོངས་རུས་པའི་གཏིང་ནས་བཀའ་དྲིན་ཆེ་ཞུ་རྒྱུ་ཡིན་ལགས། ང་ཚོའི་སྙིང་དང་བསམ་བློ་གཡོ་བ་མེད་པར་ཁྱེད་ཚོ་དང་མཉམ་དུ་ཡོད།

བོད་མི་དང་བོད་པའི་གྲོགས་པོ་ཚོར་ནན་སྐུལ་བྱེད་རྒྱུ་ཞིག་ལ། དཀའ་སྡུག་དང་བཙན་འཛུལ་འོག་ཡོད་པའི་བོད་ནང་གི་བོད་མི་ཚོའི་དཀའ་ངལ་སེལ་ཐབས་དང་། ༧གོང་ས་མཆོག་ཁོང་ཉིད་ལ་དབང་བའི་ཕོ་བྲང་པོ་ཏཱ་ལའི་ནང་ཕྱིར་ཕེབས་ཐུབ་རྒྱུའི་གནད་དོན་ཐད་ལ་མཉམ་རུབ་གནང་རོགས་གནང་ཞུ་རྒྱུ་ཡིན། འོས་འཕེན་བརྒྱུད་རིམ་ཁྲོད་ཀྱི་འཛུལ་ཞུགས་དང་སེམས་ཤུགས་དེ་ང་ཚོའི་མཐོང་ཆོས་སུ་གྱུར་ཡོད་པས། ངས་ལས་དོན་གང་ཞིག་གི་ཐད་ལའང་མུ་མཐུད་ནས་བོད་མི་ཚང་མ་མཉམ་ཞུགས་གནང་རོགས་ཞེས་ནན་སྐུལ་ཞུ་རྒྱུ་ཡིན། ད་ལྟའི་དུས་ཚོད་འདི་བོད་མི་ཚོས་འོས་འགན་ཆེན་པོ་ཞིག་འཁྱེར་དགོས་པའི་དུས་ལ་བབས་ཡོད་པ་དང་། ངའི་ངོས་ནས་བོད་མི་ཚོས་གནས་བབ་ཅིག་གི་ཐོག་ལ་བཞག་པ་བཞིན་གང་ཐུབ་བྱེད་ངེས་ཡིན་ཞིང་། བསླེབ་ལ་ཉེ་བའི་བཀའ་ཤག་གི་ལས་དོན་ལམ་ལྷོང་ཡོང་དང་མི་ཡོང་བོད་མི་ཚང་མའི་འབྲེལ་ལམ་དང་ལས་དོན་བྱེད་ཕྱོགས་ལ་རག་ལས་པ་ཞིག་རེད། མཉམ་རུབ་ཀྱི་ཐོག་ནས་མ་འོངས་ལམ་ཕྱོགས་དེ་ཚད་ལྡན་ཞིག་གི་ཐོག་མདུན་བསྐྱོད་བྱེད་ཐུབ་རྒྱུ་ཡིན་པ་ང་ལ་གདེང་ཚོད་ཆེན་པོ་ཡོད། བོད་རྒྱལ་ལོ།

 http://www.facebook.com/lobsang.sangay?sk=wall