ཁམས་དཀར་མཛེས་སུ་ཞི་རྒོལ་གནང་བཞིན་པ།

     ཕྱི་ཚེས་ ༧ ཉིན་དཀར་མཛེས་རྫོང་ཁོངས་བེ་རི་དགོན་གྱི་རང་ལོ་ ༣༡ ཡིན་པའི་གྲྭ་འོད་ཟེར་ཕུན་ཚོགས་ལགས་ཀྱིས་དཀར་མཛེས་རྫོང་གི་ཁྲོམ་ལམ་དུ། བོད་རང་བཙན་གྱི་སྦྱར་ཡིག་གཏོར་བཞིན། ༧གོང་ས་མཆོག་སྐུ་ཚེ་བརྟན་པར་ཤོག་ཅེས་སྐད་འབོད་བརྒྱབ་མཐར་རྒྱ་གཞུང་གི་ཉེན་རྟོག་པས་འཛིན་བཟུང་བྱས་ཏེ། ད་ཆར་ཁོང་དཀར་མཛེས་རྫོང་གི་མི་དམངས་སྨན་ཁང་གི་ཉེ་འགྲམ་དུ་ཡོད་པའི་བཙོན་ཁང་ནང་བཅུག་ཡོད་འདུག

ཚེས་ ༡༠ ཉིན་བོད་ནང་ཉིན་གུང་ཆུ་ཚོད་ ༡༢ ཙམ་དཀར་མཛེས་དགོན་དུ་སློབ་སྦྱོང་བྱེད་བཞིན་པའི་རྩིས་ཚང་དགོན་གྱི་རང་ལོ་ ༣༠ ཡིན་པའི་གྲྭ་མགོ་དབྱངས་གིས་དཀར་མཛེས་རྫོང་གི་ཁྲོམ་གཞུང་དུ“གོང་ས་མཆོག་སྐུ་ཚེ་ཁྲི་ལོ་བརྟན་པ་ཤོག བོད་ལ་རང་དབང་དགོས། སྐུ་ཞབས་སྤང་རི་སྣ་རིན་པོ་ཆེ་མཆོག་གིས་དབུས་ཆབ་སྲིད་བཙོན་པ་རྣམས་ཀློད་གྲོལ་གཏོང་དགོས” ཞེས་སྐད་འབོད་རྒྱག་སྐབས་དྲག་ཆས་ཉེན་རྟོག་པ་དང་། དམག་མིས་འཛིན་བཟུང་བྱས་འདུག

ཉིན་དེའི་ཕྱི་དྲོའི་ཆུ་ཚོད་ ༥ པ་ཙམ་ལ་དཀར་མཛེས་རྫོང་གི་ཁྲོམ་གཞུང་དུ། དཀར་མཛེས་ལམ་བྲག་བཙུན་དགོན་གྱི་བཙུན་མ་རང་ལོ་ ༢༥ ཡིན་པའི་བྱམས་པ་ལྷ་མཚོ་དང་། རང་ལོ་ ༢༠ ཡིན་པའི་བཙུན་མ་རིན་དགའ་གཉིས་ཀྱིས། “རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོ་བརྟན་པར་ཤོག  བོད་ནང་ཆོས་དད་རང་དབང་མི་འདུག” ཞེས་སྐད་འབོད་བརྒྱབ་ཅིང་། བོད་རང་བཙན་སྐོར་གྱི་ཡིག་ཆ་གཏོར་འགྲེམས་བྱས་ཏེ། རྒྱ་གཞུང་གི་ཉེན་རྟོག་པས་ཉེས་རྡུང་ལྟ་མི་བཟོད་པ་གཏོང་བཞིན་རླངས་འཁོར་ནང་བཅུག་སྟེ་བཙན་ཁྲིད་བྱས་ཡོད་འདུག

ཕྱི་ཚེས་ ༡༡ ཉིན་དཀར་མཛེས་བེ་རི་དགོན་པའི་དགེ་བསྐོས་ཟུར་པ་པདྨ་ཚེ་རིང་ལགས་ཀྱིས་༧རྒྱལ་བ་རིན་པོ་ཆེ་ཁྲི་ལོ་བརྟན་པར་ཤོག བོད་རང་བཙན་ཡིན་ཟེར་བ་སོགས་ཀྱི་སྐད་འབོད་བརྒྱབ་མཐར་རྒྱ་གཞུང་གི་ཉེན་རྟོག་པས་འཛིན་བཟུང་བྱས་ཡོད་འདུག

ཚེས་ ༡༢ ཉིན་བོད་ནང་སྔ་དྲོ་ཆུ་ཚོད་ ༡༠ པ་ཙམ་ལ་དཀར་མཛེས་རྫོང་། ཉི་མོ་དགེ་ཚུལ་དགོན་གྱི་རང་ལོ་ ༢༧ ཡིན་པའི་བཙུན་མ་ཡེ་ཤེས་ལྷ་མཚོ་ལགས་དང་། རང་ལོ་ ༢༢ ཡིན་པའི་བཙུན་མ་ཆོས་དབྱངས་ལགས། རང་ལོ་ ༢༢ ཡིན་པའི་བཙུན་མ་སྤེན་པ་ལྷ་མོ་ལགས་གསུམ་གྱིས་དཀར་མཛེས་རྫོང་ཐོག་ཏུ་ཞི་རྒོལ་བྱས་པར་བརྟེན། དྲག་ཆས་ཉེན་རྟོག་པ་དང་དམག་མིས་འཛིན་བཟུང་བྱས་ཡོད་འདུག

 ཉིན་དེར་མཚན་གསལ་བོ་མ་ངེས་པའི་གྲྭ་པ་ཞིག་གིས་དཀར་མཛེས་རྫོང་ཐོག་ཏུ་ཞི་རྒོལ་བྱས་ཏེ། དྲག་ཆས་ཉེན་རྟོག་པའི་ཉེས་རྡུང་ཚད་མེད་གཏོང་བཞིན་འཛིན་བཟུང་བྱས་འདུག ད་ཆར་རྒྱ་གཞུང་གིས་ཁམས་དཀར་མཛེས་རྫོང་ཁུངས་སུ་ཡུལ་དགོན་གཉིས་ལ་དམ་དྲག་ཤུགས་ཆེན་བྱེད་བཞིན་ཡོད་འདུ

གདུང་སེམས་མཉམ་སྐྱེད་ཀྱི་མར་མེ་ཁྲོམ་སྐོར།

   དེ་རིང་ཕྱི་དྲོའི་ཆུ་ཚོད་ ༦ སྟེང་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་གོ་སྒྲིག་འོག་བཞུགས་སྒར་ངྷ་རམ་ས་ལར་མར་མེ་ཁྲོམ་སྐོར་གྱི་ལས་འགུལ་ཞིག་སྤེལ་ཡོད་ཅིང་། དེ་ནི་ཉིན་འདི་འགར་ཁམས་དཀར་མཛེས་ས་ཁུལ་གྱི་བོད་རིགས་སྐྱ་སེར་མི་མང་ཚོས་གཅིག་རྗེས་གཉིས་མཐུད་དུ་རྒྱ་གཞུང་ལ་ཞི་བའི་ངོ་རྒོལ་སྐད་འབོད་གནང་སྟེ། རྒྱ་གཞུང་གིས་བོད་ཐོག་ལ་ལག་བསྟར་བྱེད་བཞིན་པའི་སྲིད་བྱུས་ལ་འདོད་པ་མེད་པའི་རྣམ་འགྱུར་ཤུགས་ཆེན་སྟོན་བཞིན་ཡོད་པ་དེར་ས་གནས་ཉེན་རྟོག་ཚན་པ་དང་། དྲག་ཆས་དམག་དཔུང་གིས་བོད་མི་ཞི་རྒོལ་བ་རྣམས་འཛིན་བཟུང་བཙོན་འཇུག་དང་། ཉེས་རྡུང་མནར་གཅོད་མི་སྤྱོད་ལས་འདས་པ་གཏོང་གི་ཡོད་པ་དེ་ལ་ངོ་རྒོལ་དང་། མནར་གཅོད་འོག་གི་སྤུན་ཟླ་ཚོར་གདུང་སེམས་མཉམ་སྐྱེད་མཚོན་ཕྱིར་མར་མེ་ཁྲོམ་སྐོར་དེ་གནང་བ་ཞིག་ཡིན་འདུག

མར་མེ་ཁྲོམ་སྐོར་གྱི་མཇུག་བསྡོམས་སྟེང་ཐེག་ཆེན་ཆོས་གླིང་གཙུག་ལག་ཁང་དུ། དགུ་བཅུ་གསུམ་ལས་འགུལ་ཚོགས་པས་ཡིག་ཐོག་གི་གསར་འགོད་བསྒྲགས་གཏམ་ཞིག་སྒྲོག་འདོན་བྱས་པའི་ནང་། ཞི་བའི་མང་ཚོགས་ཀྱིས་འཛོག་མགོ་གནམ་ལ་འཕྱར་ཏེ། “ བོད་རང་བཙན་ཡིན། ༧རྒྱལ་བ་རིན་པོ་ཆེ་སྐུ་ཚེ་ཁྲི་ལོ་བརྟན་པར་ཤོག རྒྱ་མི་བོད་ནས་ཕྱིར་རྒྱུག ” ཞེས་ཁྲིམས་མཐུན་ལུགས་མཐུན་གྱི་སྐད་འབོད་ཁྲོམ་སྐོར་ཙམ་བྱས་པར། རྒྱ་གཞུང་གིས་གོ་མཚོན་སྤྱད་དེ་ཉི་མ་ཁ་དཀར་ངོ་དཀར་ལ་མང་ཚོགས་དམར་གསོད་གཏོང་རྐྱང་བྱེད་ཀྱིན་ཡོད། ༢༠༠༨ ལོར་བོད་ས་ཡོངས་ནས་དགྲ་བོ་རྒྱ་དམར་གཞུང་ལ་ཁ་གཏད་གཅོག་པའི་གནས་སྟངས་མང་པོའི་ཁྲོད། ལོ་དེར་མདོ་ཁམས་དཀར་མཛེས་ཁུལ་གཅིག་པུ་ནས་མི་གྲངས་ ༧༠ ལྷག་ཞི་རྒོལ་ནང་ཞུགས་ཏེ་རྒྱ་དམར་གཞུང་གིས་འཛིན་བཟུང་བྱས་ཡོད། སྐབས་དེར་དམ་ཚིག་མཁའ་འགྲོ་དང་ཤེས་རབ་དབྱངས་མཚོ། གྲྭ་པདྨ་རྒྱལ་མཚན། བཙུན་མ་དབྱངས་སྐྱིད་སྒྲོལ་མ་བཅས་ཀྱི་སྐུ་སྲོག་ཤོར་བའི་ཁར། ཉིན་འདི་དག་ནང་སླར་ཡང་དཀར་མཛེས་ཁུལ་ནས་མི་གྲངས་ ༡༧ ཙམ་ཞིག་འཛིན་བཟུང་བྱས་འདུག་ལ། ལོ་དེར་བཙུན་མ་བདེ་དགའ་ཡིས་དཀར་མཛེས་ཁྲོམ་གཞུང་དུ་སྐད་འབོད་བྱས་མཐར་ལུས་ལ་མེ་མདའ་ཕོག་སྟེ། ལོ་གསུམ་གྱི་ཁྲིམས་ཆད་བཏང་རྗེས་སྨན་ཁང་ནང་ཉིན་གཉིས་ཀྱི་རྗེས་སླར་ཡང་འཛིན་བཟུང་གིས་ཁྲིམས་ཐག་ལོ་བཞི་ནས་ལྔ་བར་བཅད་འདུག ལོ་དེའི་ཟླ་ ༣ ཚེས་ ༡༨ ཉིན་དཀར་མཛེས་རྫོང་དུ་ཞིང་པ་དོན་ལྡན་ལ་དམག་མིས་རྡུང་རྡེག་དྲག་པོ་བཏང་ཡང་ཡུན་འཐུང་ནང་ཉེན་གཡོལ་དུ་ཐར་ཙམ་བྱུང་འདུག ད་ཆར་ཁུངས་ལྡན་གནས་ཚུལ་ལྟར་ན། ད་ལོའི་ཕྱི་ཟླ་ ༣ ཚེས་ ༣ ཉིན་ཞིང་པ་དོན་ལྡན་རང་ཁྱིམ་དུ་འདས་གྲོངས་སུ་གྱུར་འདུག ཅེས་བཀོད་འདུག

བསྒྲགས་གཏམ་དེའི་མཇུག་ཏུ། ༢༠༠༨ ལོ་ནས་བཟུང་དུས་རབས་ཉེར་གཅིག་པའི་འཕྲུལ་རིག་ལག་རྩལ་ཏེ། དྲ་རྒྱ་དང་ལག་འཁྱེར་ཁ་པར། བརྙན་འཕྲིན་བརྒྱུད་སྤྲོད་སོགས་ཀྱི་མཐུན་རྐྱེན་འོག བོད་ས་སྟོད་སྨད་ཡོངས་དང་བོད་གཞིས་བྱེས་གཉིས་མ་གྲོས་བསམ་པ་གཅིག་མཐུན་གྱིས་རྒྱ་རྒོལ་འཐབ་རྩོད་ཀྱི་ཡོལ་བ་གསར་པ་ཞིག་སྒོ་ཕྱེ་ཡོད། མང་ཚོགས་རང་བཞིན་གྱི་ལས་འགུལ་འདི་ནི་རང་ཕྱོགས་ལ་མཐའ་མའི་རྒྱལ་ཁ་ཐོབ་ངེས་ཀྱི་དན་རྟགས་ཡིན་པ་ང་ཚོར་ཡིད་ཆེས་ཀྱིས་ཁེངས་ཡོད། ཅེས་བཀོད་འདུག