བཙན་བྱོལ་བོད་གཞུང་བཀའ་ཤག་གིས་རྒྱལ་སྤྱིའི་གཞུང་དང་གཞུང་འབྲེལ་མིན་པའི་ཚོགས་པ་ཁག་ལ་འབོད་སྐུལ་ཞུས་པ།

༢༠༡༡ ཟླ་ ༤ ཚེས་ ༢༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༢༡ དགོང་མོ་རྒྱ་ནག་གཞུང་གི་དམག་མི་སྣུམ་འཁོར་ ༡༠ ཙམ་རྔ་པ་ཀིརྟི་དགོན་པར་བཏང་འབྱོར་གྱིས་དགེ་འདུན་པ་ ༣༠༠ ཙམ་བཙན་འཁྲིད་བྱེད་སྐབས་རྔ་པ་ས་གནས་བོད་མི་མང་པོ་ཞིག་དང་ལྷག་པར་བོད་མི་རྒན་གྲས་ཁག་གཅིག་གིས་རྒྱ་མིའི་དམག་མི་ཚོར་འགོག་རྐྱེན་བཟོ་སྐབས་རྒྱ་མིའི་དམག་མིས་བོད་མི་རྣམས་ལ་གཅར་རྡུང་ཚད་མེད་བཏང་ཡོད་པ་མ་ཟད། བོད་མི་རྒན་གྲས་དོན་གོ་ཟེར་བ་རང་ལོ་ ༦༠ དང་ཤེར་སྐྱིད་རང་ལོ་ ༦༥ གཉིས་རྐྱེན་ལམ་དུ་བཏང་ཡོད། ཨ་མདོ་རྔ་པའི་ས་གནས་བོད་མི་དང་ཀིརྟི་དགོན་པའི་དགེ་འདུན་པ་རྣམས་ལ་རྒྱ་ནག་གཞུང་གིས་དྲག་གནོན་ཤུགས་ཆེ་བྱེད་བཞིན་པའི་ཛ་དྲག་གི་གནས་སྟངས་ཤིག་ཆགས་ཡོད་པར་བརྟེན། བཙན་བྱོལ་བོད་གཞུང་བཀའ་ཤག་གིས་རྒྱལ་སྤྱིའི་གཞུང་དང་གཞུང་འབྲེལ་མིན་པའི་ཚོགས་པ། གྲོས་ཚོགས་ཀྱི་འཐུས་མི་བཅས་ལ་འབོད་སྐུལ་གྱི་ཞུ་ཡིག་ཅིག་ཕྱི་ཚེས་ ༢༣ རེས་གཟའ་སྤེན་པའི་ཉིན་ཕུལ་བའི་ནང་དོན་གཙོ་བོ་ནི།
   ཁུངས་ལྡན་གནས་ཚུལ་ལ་གཞི་བཅོལ་ཏེ་དཔྱད་སྐབས་བོད་མདོ་སྨད་རྔ་པ་ཀིརྟི་དགོན་པའི་གནས་སྟངས་དེ་བཞིན་ད་ཆ་ཧ་ཅང་ཛ་དྲག་ཏུ་གྱུར་ཡོད།
   ས་གནས་དེར་ཕྱི་མི་རྟོག་ཞིབ་པ་དང་ཁྲིམས་ཀྱི་སྲུང་སྐྱོབ་མེད་པ། རང་དབང་ཅན་གྱི་གསར་འགོད་པ་སོགས་ལ་དམ་བསྒྲགས་བྱེད་བཞིན་པར་བརྟེན།  བོད་རིགས་མང་པོ་དམར་གསོད་གཏོང་རྒྱུའི་གནས་སྟངས་ཤིག་ཏུ་འགྱུར་སྲིད། ཛ་དྲག་གི་གནས་སྟངས་དེར་གཞིགས་ཏེ་བཙན་བྱོལ་བོད་གཞུང་བཀའ་ཤག་གིས་རྒྱལ་སྤྱིའི་གཞུང་དང་གཞུང་འབྲེལ་མིན་པའི་ཚོགས་པ། གྲོས་ཚོགས་འཐུས་མི་བཅས་ལ་བོད་མདོ་སྨད་རྔ་པ་ཀིརྟི་དགོན་པའི་དཀའ་ངལ་རྣམས་རྒྱ་ནག་གཞུང་གིས་དྲག་གནོན་ཐོག་ནས་སེལ་ཐབས་བྱེད་རྒྱུ་མཚམས་འཇོག་ཡོང་རྒྱུ་དང་། འཛིན་བཟུང་བྱས་པའི་དགེ་འདུན་པ་རྣམས་འཕྲལ་དུ་གློད་བཀྲོལ་ཡོང་ཆེད་རྒྱ་ནག་གཞུང་ལ་འབོད་སྐུལ་གནང་རོགས་ཞེས་ང་ཚོས་རེ་འདུན་ཞུ་བཞིན་ཡོད།
ཕྱོགས་མཚུངས་བདུན་ཕྲག་རྗེས་མར་ཨ་རི་དང་རྒྱ་ནག་གཉིས་དབར་འགྲོ་བ་མིའི་ཐོབ་ཐང་གི་ལོ་འཁོར་ཚོགས་ཆེན་སྐབས་རྔ་པ་ཀིརྟི་དགོན་པ་དང་རྔ་པ་ས་གནས་བོད་མི་རྣམས་ལ་འཕྲད་བཞིན་པའི་དཀའ་ངལ་གྱི་གནད་དོན་དེ་ངེས་པར་དུ་གླེང་སློང་ཡོང་རྒྱུར་ང་ཚོས་རེ་བ་ཞུ་བཞིན་ཡོད་པ་མ་ཟད། རྒྱལ་ཁབ་གཞན་རྣམས་ཀྱིས་ཀྱང་རྒྱ་ནག་སྲིད་གཞུང་དང་གྲོས་མོལ་སྐབས་གནད་དོན་དེའི་སྐོར་ངེས་པར་དུ་གླེང་རོགས་ཞེས་འབོད་སྐུལ་ཞུ་བཞིན་ཡོད།
    བོད་མི་ཚོའི་དོན་དམ་གྱི་དཀའ་ངལ་རྣམས་དྲག་པོའི་ལམ་ནས་སེལ་ཐབས་བྱེད་རྒྱུའི་ཐབས་ལམ་དེ་ནོར་བ་ཞིག་ཡིན། ཀིརྟི་དགོན་པའི་དགེ་འདུན་པ་ཚོར་དངོས་ཡོད་ཀྱི་དཀའ་ངལ་འཕྲད་བཞིན་ཡོད་པ་དང་། དཀའ་ངལ་དེ་དག་སེལ་རྒྱུར་རྒྱ་ནག་གཞུང་གི་དཔོན་རིགས་ཚོར་གུ་ཡངས་དང་བཟོད་བསྲན་ཐོག་ནས་དཀའ་ངལ་སེལ་རྒྱུའི་འདུན་པ་དགོས་པ་ཡིན་ཞེས་སོགས་འཁོད་ཡོད་པ་བཅས།

ཀིརྟི་རིན་པོ་ཆེའི་འབོད་སྐུལ

    ཕྱི་ཚེས་ ༢༢ ཉིན་ཀིརྟི་རིན་པོ་ཆེ་མཆོག་ནས་རྒྱ་གཞུང་གིས་རྔ་པ་ཀིརྟི་དགོན་གྲོང་གཉིས་ལ་ཧ་ང་བའི་དྲག་གནོན་བྱས་ཏེ། མུ་མཐུད་དུ་གྲྭ་བ་རྣམས་འཛིན་བཟུང་བཙན་འཁྲིད་དང་མང་ཚོགས་ལ་གཅར་རྡུང་དྲག་གནོན་བྱས་ཏེ་ཛ་དྲག་གི་གནས་སྟངས་འོག་ཚུད་ཡོད་པའི་ཐད། གཞིས་བྱེས་གཉིས་ཀྱི་ཀིརྟིའི་དགོན་མ་ལག་ཐམས་ཅད་ཀྱི་ངོ་ཚབ་གནང་སྟེ། སྟོན་པ་དང་བསྟན་པ་གཅིག་ཏུ་གྱུར་པའི་འཛམ་གླིང་ཤར་ནུབ་ཀྱི་དགོན་སྡེ་དང་གྲྭ་ཚང་། ཆོས་ཚོགས། ཆོས་གྲོགས་ཡོངས་ལ་འབོད་སྐུལ་གྱི་གསུང་འཕྲིན་ཅིག་བོད་རྒྱ་དབྱིན་གསུམ་གྱི་ཐོག་ནས་ཕུལ་འདུག

གསུང་འཕྲིན་ནང་། རྒྱ་གཞུང་གིས་རྔ་པ་ཀིརྟིའི་དགོན་གྲོང་སྤྱི་དང་ལྷག་པར་དུ་རྔ་པ་ཀིརྟིའི་དགོན་ཆེན་འདི་ཉིད་བཙོན་ཁང་ལྟ་བུའི་ངོ་བོར་བསྒྱུར་ནས་གྲྭ་པ་ཉིས་སྟོང་ལྔ་བརྒྱ་ལྷག་གིས་སྡུག་སྦྱོང་མནར་གཅོད་ཉིན་མཚན་མི་འཁྱོལ་བའི་དཀའ་བ་མྱངས་དང་མྱོང་བཞིན་པར་མ་ཟད། ཉེ་སྔོན་དོ་དམ་འོག་ཟླ་བ་གཅིག་དང་ཞག་དྲུག་སོང་མཚམས་ཕྱི་ཟླ་ ༤ ཚེས་ ༢༢ ཐོ་རངས་གྲྭ་པ་ ༣༠༠ ལྷག་དུས་གཅིག་ཏུ་ཕྱི་ལ་བཙན་ཁྲིད་ཟིན་པ་དང་། ད་དུང་ཡང་ཁྲིད་དང་འཁྲིད་བཞིན་པའི་གནས་ཚུལ་གོ་བཞིན་འདུག་ན།   གྲྭ་པ་རྣམས་ཀྱི་ཚེ་སྲོག་ལའང་ཉེན་ཁ་ཆེ་ཞིང་སྡུག་སྦྱོང་མནར་གཅོད་ཚད་མེད་མྱོང་བཞིན་པར་མ་ཟད། ཆོས་ཀྱི་སྡེ་ཆེན་པོ་འདི་ཉིད་རྨེག་མེད་དུ་འཇོམས་པའི་སྲིད་བྱུས་ངན་པ་ལག་ལེན་དུ་བསྟར་མུས་ལ་བརྟེན། ད་ལམ་ ༸སྙན་སེང་མི་ཞུ་ཐུ་མེད་ལ་དགོན་སྡེ་དང་གྲྭ་ཚང་། ཆོས་ཚོགས། ཆོས་ཀྱི་གྲོགས་པོ་རྣམས་ནས་རྔ་པ་ཀིརྟིའི་དགོན་ཆེན་འདི་ཉིད་ཛ་དྲག་གི་གནས་སྟངས་ཡ་ང་བ་ལས་མྱུར་དུ་སྐྱོབ་པའི་སྐྱབས་འཇུག་དང་འབྲེལ་རྒྱབ་སྐྱོར་གྱི་ངོ་བོ་མཚོན་པའི་ལས་འགུལ་གཞི་རྒྱ་ཆེ་ཙམ་ཞིག་སྤེལ་གནང་ཡོད་པ། ཞེས་འབོད་སྐུལ་སྐྱབས་འཇུག་གནང་འདུ

ཛ་དྲག་གནས་ཚུལ།

    ཁ་སང་ཕྱི་ཚེས་༢༡ཉིན་གྱི་བོད་ནང་གི་མཚན་མོའི་དུས་ཚོད་༩ཙམ་ནས་རྔ་པ་ཀིརྟི་དགོན་པའི་གྲྭ་ཤག་རེ་རེར་རྒྱ་གཞུང་གིས་དྲག་ཆས་དམག་དཔུང་དང་།ཉེན་རྟོག་པ།ཁྱད་ལས་དྲག་དམག་བཅས་འགྲེམས་འཇོག་བྱས་ཏེ་དགེ་འདུན་པ་༣༠༠ལྷག་འཛིན་བཟུང་གིས་སྤྱི་སྤྱོད་རླངས་འཁོར་ཆེ་བ་བཅུ་གྲངས་ཤིག་གི་ནང་བླུགས་ནས་ས་གནས་གཞན་ཞིག་ཏུ་ཁྱེར་ཡོད་འདུགས་གནས་ཡུལ་མི་ཚོས་གོ་ཐོས་བྱུང་བ་ལྟར་ན་གྲྭ་པ་རྣམས་རྔ་པ་རང་སྐྱོང་ཁུལ་གྱི་བུན་ཁྲོན་རྫོང་དང་།མོའོ་རྫོང་།བཀྲ་ཤིས་གླིང་རྫོང་བཅས་སུ་བཙན་ཁྲིད་བྱས་འདུག

བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་ལགས་གཉིས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན།མདང་དགོང་གྲྭ་པ་རྣམས་འཛིན་བཟུང་བཙན་ཁྲིད་བྱ་སྐབས།དེ་སྔ་ནས་དགོན་པའི་ཉེ་འདབས་སུ་ཉིན་མཚན་གཉིས་ཀར་དགེ་འདུན་པ་རྣམས་སྲུང་སྐྱོབ་ཆེད་བསྡད་ཡོད་པའི་ལོ་ན་རྒན་རྒོན་གཙོས་མང་ཚོགས་༢༠༠ལྷག་ཡོད་པ་རྣམས་ཀྱིས་བཀག་འགོག་བྱས་པར་གཅར་རྡུང་དྲག་པོ་བཏང་སྟེ།དགུང་ལོ་༦༠ཡིན་པའི་མཐའ་བ་གོང་མའི་དོན་ཁོ་དང་།དགུང་ལོ་༦༥ཡིན་པའི་གཅའ་ཞང་ནག་ཚང་མའི་ར་ཁོ་ཚང་གི་ཤེར་སྐྱིད་གཉིས་རྐྱེན་ལམ་དུ་བཏང་ཡོད་པར་མ་ཟད། རྒན་མོ་ཞིག་གི་རྐང་པའང་དུམ་བུ་གསུམ་དུ་བཅག་པ་སོགས་མི་མང་པོའི་རྐང་ལག་བཅག་ཡོད་པའི་གནས་ཚུལ་བྱུང་ཡོད་པ་དང་།སྐབས་དེར་མང་ཚོགས་ནས་སྐད་ཤུགས་ཆེན་པོས་ངུ་འབོད་བྱས་པར་ཁ་ནང་དུ་རས་སོགས་བརྫངས་ཏེ་བཙན་གྱིས་སྐད་བརྒྱག་བཅུག་མེད་པ་རེད།རྗེས་སུ་མི་མང་རྣམས་དོ་སྐྱེལ་རླངས་འཁོར་བཞིའི་ནང་ལ་བླུགས་ནས་གཉིས་དམག་སྒར་ནང་ཁྱེར་ཡོད་པ་དང་།གཉིས་རས་བོང་ཞེས་པའི་དུར་སའི་ནང་ཁྱེར་ཡོད་འདུགཕྱི་ཚེས་༢༢ཉིན་མི་ཕལ་ཆེ་བ་གློད་ཡོད་ནའང་ལོ་གཞོན་པ་ཁག་ཅིག་མུ་མཐུད་དུ་བཀག་ཉར་བྱས་ཡོད་པ་དང་།ནགས་ལས་བློ་བཟང་ཚང་གི་བུ་མོ་ཞིག་ཀྱང་མདང་དགོང་བཙན་འཁྲིད་བྱས་ཏེ་གར་སོང་ཆ་མེད་དུ་གྱུར་ཡོད་འདུ

ཕྱི་ཚེས་༢༡ཉིན་གྱི་ཕྱི་དྲོའི་བོད་ནང་གི་ཆུ་ཚོད་༤ཙམ་ནས་བཟུང་།ཆུ་ཚོད་༢༤རིང་རྔ་པ་རྫོང་ཁོངས་ཀྱི་ཁ་པར་རིགས་ཚང་མའི་བརྡ་རྟགས་རྩ་བ་ནས་མེད་པ་ཆགས་ཡོད་པ་རེད།དེ་རིང་ཕྱི་ཚེས་༢༢ཉིན་གྱི་བོད་ནང་གི་ཕྱི་དྲོའི་ཆུ་ཚོད་༥ཙམ་ལ་སླར་ཡང་དགོན་པའི་ནང་སྤྱི་སྤྱོད་རླངས་འཁོར་ཆེ་བ་༥སླེབས་ཡོད་པ་དང་།རླངས་འཁོར་དེ་དག་གི་ཨང་གྲངས་དང་།རྩུབ་གཡས་གཡོན་གྱི་ཡི་གེ་ཚང་མ་གབ་ནས་མི་མཐོང་བར་བཟོས་ཡོད་འདུག ས་གནས་མང་ཚོགས་ནས་དོ་དགོང་ཡང་གྲྭ་པ་མང་པོ་ཞིག་འཛིན་བཟུང་བྱས་ཡོང་བར་བློ་འཚབ་གནང་བཞིན་ཡོད་འདུག

བོད་ཀྱི་དུས་བབ་ལས།

གདུང་སེམས་མཉམ་སྐྱེད།

    དེ་རིང་ངྷ་ས་ཐེག་ཆེན་གཙུག་ལག་ཁང་གི་སྒོ་ཆེན་མདུན་ཐང་དུ་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག  རྒྱ་གར་རྒྱལ་ཡོངས་སྤྱི་ཚོགས་བདེ་དོན་ཚོགས་པའི་(Rashtriya Swayamsevak Sangh -RSS) ཚོགས་གཙོ་སྐུ་ཞབས་ཀུ་མར་ (Indresh Kumar ) དང་། བྷི་ཇི་པི་ (BJP) དྲུང་ཆེ་ཟུར་བ་སྐུ་ཞབས་ཨ་ཆཱ་རེ་ཡཱ་ ( Govind Acharya) ལགས་གཉིས་ཕེབས་ཏེ།རྔ་བ་ཀིརྟི་དགོན་དུ་རྒྱ་གཞུང་གིས་དམ་དྲག་བྱེད་བཞིན་པ་མྱུར་དུ་མཚམས་འཇོག་བྱ་དགོས་པའི་དགོས་འདུན་འོག ཉེ་ཆར་ནས་ཟས་བཅད་ངོ་རྒོལ་གནང་བཞིན་པ་ཚོར་འཚམས་འདྲི་གནང་པ་མ་ཟད།  རྒྱ་ནག་གཞུང་གིས་རྔ་པ་ཀིརྟི་དགོན་ལ་དྲག་གནོན་བྱེད་བཞིན་པར་ངོ་རྒོལ་དང་།རྒྱ་གར་མི་མང་གིས་དྲག་གནོད་འོག་གི་བོད་མི་ཚོར་རྒྱབ་སྐྱོར་དང་གདུང་སེམས་མཉམ་སྐྱེད་ཡོད་པའི་གསུང་བཤད་ཀྱང་གནང་སོང་།

ཐོག་མར་སྐུ་ཞབས་ཀུ་མར་ལགས་ཀྱིས་ཐེངས་འདིར་ཁོ་ཚོ་དྷ་སར་ཡོང་དོན་ནི། འབྱུང་འགྱུར་གྱི་ཕྱི་ཟླ་༡༠ཚེས་༢༩ནས་ཉིན་གྲངས་བཅུའི་རིང་རྡོ་རྗེ་གདན་དུ་ཧིན་རྡི་ཆོས་དཔོན་མུ་རཱ་རེ་བྷ་བྷུ་ (Shri Murari Babu) ལགས་ཀྱིས་ཧིན་རྡི་ཆོས་འཕྲིན་ཆེན་མོ་ཞིག་འཚོགས་གཏན་ཁེལ་ཡོད་པ་དེར།༧གོང་ས་མཆོག་གདན་འདྲེན་ཞུ་ཆེད་ཡིན་སྐོར་གསལ་བཤད་གནང་རྗེས། ཁོང་གིས་རྒྱ་གར་དང་བོད་པའི་གསར་འགོད་པར་བརྗོད་དོན། ད་ལྟ་རྔ་པ་ཀིརྟི་དགོན་ལ་རྒྱ་ནག་གཞུང་གིས་དྲག་གནོན་བྱེད་བཞིན་པ་མྱུར་དུ་མཚམས་འཇོག་ཆེད། རྒྱ་གར་གཙོས་རྒྱལ་སྤྱིའི་སྲིད་གཞུང་དང་ཚོགས་སྡེ་ཁག་གིས་གནོན་ཤུགས་སྤྲོད་དགོས།རྒྱ་གཞུང་གིས་བོད་ཡུལ་འཛུགས་སྐྲུན་ཡར་རྒྱས་གཏོང་གི་ཡོད་ཚུལ་གྱི་ཁ་གཡང་འོག དོན་གྱིས་བོད་མི་ཚོར་བྲན་གཡོག་ལམ་ལུགས་ལག་བསྟར་བྱེད་ཀྱིན་པ་དེར་མཐའ་གཅིག་ཏུ་ངོ་རྒོལ་ཡོད།ཅེས་བརྗོད་བྱུང་།

མུ་མཐུད་དུ་སྐུ་ཞབས་ཨ་ཆཱ་རེ་ཡཱ་ལགས་བརྗོད་དོན།  བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་མེད་པ་དང་།ཐེངས་འདིར་རྔ་པ་ཀིརྟི་དགོན་པར་རྒྱ་གཞུང་གིས་དྲག་གནོན་བྱེད་ཀྱིན་པ།ཆོས་བྱེད་དགོན་སྡེ་ཁག་ནང་རྒྱ་ནག་དྲག་ཆས་དམག་མིས་གང་བྱུང་བཙན་འཛུལ་བྱས་པ་བཅས་དོན་ཚན་གསུམ་ལ་རྒྱལ་སྤྱིའི་སྤྱི་ཚོགས་ཀྱིས་དོ་སྣང་བྱ་དགོས་པ་དང་།ལྷག་པར་དུ་རྒྱ་གར་གཞུང་གིས་ལངས་ཕྱོགས་བརྟན་པོ་བཟུང་སྟེ།གནད་དོན་འདི་དག་གི་ཐད་རྒྱ་གཞུང་དང་མཉམ་དུ་སྐད་ཆ་བཤད་དགོས་པ་རེད།ཅེས་དང་།དེ་བཞིན་རྒྱ་གཞུང་གིས་བོད་ཀྱི་ཁོར་ཡུག་ལ་གཏོར་སྐྱོན་གཏོང་བཞིན་པའི་གནད་དོན་ཐད་རྒྱ་གར་གཞུང་གིས་གཙོ་འགན་ཁུར་ཏེ།མཉམ་འབྲེལ་རྒྱལ་ཚོགས་ཀྱི་སྡིངས་ཆའི་སྟེང་འཁྱེར་དགོས་པ་རེད། ཅེས་བརྗོད་སོང་།

མཇུག་མཐར་གཞོན་ནུའི་ཚོགས་གཙོ་མཆོག་གིས་གསུངས་དོན།དེ་རིང་གི་གསར་འགོད་གསལ་བསྒྲགས་འདི་མ་བསྐྱངས་སྔོན་ལ། ང་ཚོ་གཞུང་འབྲེལ་མ་ཡིན་པའི་ཚོགས་པ་ལྔ་ཁོང་ཚོ་དང་མཉམ་དུ་ཐུག་འཕྲད་གླེང་མོལ་བྱས་སྐབས།སྤྱིར་བོད་ཀྱི་རྩ་དོན་ཐད་རྒྱ་གར་ཡུལ་མི་དང་བོད་མིའི་མཉམ་ལས་ཇི་ལྟར་བྱ་དགོས་སྐོར་དང་།ལྷག་པར་དུ་ཐེངས་འདིར་རྔ་པ་ཀིརྟི་དགོན་ལ་རྒྱ་ནག་དྲག་ཆས་དམག་མི་སྟོང་ཕྲག་གིས་སྐོར་ཡོད་པའི་ཛ་དྲག་གི་གནས་སྟངས་ཐད།རྒྱ་གར་རྒྱལ་ཡོངས་ལ་ཤུགས་རྐྱེན་ཡོད་པའི་ཚོགས་པ་འདི་བརྒྱུད་ནས། རྒྱ་གར་གྲོས་ཚོགས་ནང་གནད་དོན་འདིའི་སྐོར་ལ་གླེང་སློང་ཡོང་ཐབས་དང་།དེ་བཞིན་རྒྱ་གར་གཞུང་དང་པེ་ཅིན་དུ་ཡོད་པའི་རྒྱ་གར་གཞུང་ཚབ་ཀྱིས་གནད་དོན་འདིའི་ཐད་རྒྱལ་སྤྱིའི་སྲིད་གཞུང་དང་ཚོགས་སྡེ་ཁག་ལ་འབོད་སྐུལ་ཞུས་ཏེ། རྔ་པ་ཀིརྟི་དགོན་ལ་དྲག་གནོན་བྱེད་བཞིན་པའི་རྒྱ་གཞུང་གི་བྱ་སྤྱོད་མྱུར་དུ་མཚམས་འཇོག་བྱ་རྒྱུར་གནོན་ཤུགས་སྤྲོད་པའི་ཐད་ནུས་པ་འདོན་དགོས་པའི་འབོད་སྐུལ་ཞུས་ཡོད། ཅེས་གསུངས་སོང་།